三十幾年前的我與他~~~天晴

有時會諗,雖然平時同佢好似好多問題咁,但係佢真係好關心我架!
始終都係兩個個體,點可以盡如人意呢?
世界咁大,可以走埋一齊~~~~好神奇!
仲有係我地細細個既時候,已經一齊玩過架嘞!!!
老鼠洲~~舅父有間機器廠係度,咁咪成日去玩囉,原來細個佢又識我舅父過喎!!!勁神奇呀!!
到後尾要發展三聖邨呀,恒福花園呀呢d住宅,先執左間廠,大家搬開曬住lu.......
隔左咁多年之後,我地竟然會結埋婚生埋仔添!
仲要係同佢結左婚見到舅父先話好熟口面喎,問我佢係邊到住同做野,
跟住一人一句講返曬出黎,大家都好記得閣樓部"有門電視",
舅父會鎖住唔比睇架~哈..哈...哈
三十幾年前已經識既我地~~~~
諗到咁,又會將以前唔開心既野delete佢,再從新入機計過數,
咁咪成日都無壞賬囉!!!!呵....呵...呵.....

死期到~~~天晴

好期待既9號終於來臨,點知親戚無依時出現!!!!!
果一日只係有少少痛,同少少腸胃炎出現.
10號睇完醫生又係話粒瘤唔算太明顯,可以嘗試打三個月一次既避孕針黎試下減少痛楚,當時個下真係滴汗,一黎打避孕針好乸痛架!第2打完d經期唔知幾時會黎,唔定時,可以一個月黎幾次or唔黎都得?咁咪仲死!醫生既口吻好似財經佬講股票咁,唔知仲會唔會痛架,可能會可能唔會,因人而異!唉...我寧願食住避孕藥先,起碼知道幾時死期到麻....嗚嗚...
到左10號晚!!!!天~~~黎料啦!!!!!
一路由8點幾痛到凌晨4點幾!成日渣住個膠盆,一路痛一路嘔!!!仲要一路喊添!
呢幾個鐘頭未試過企得直條腰,好想伸手入個肚攞曬d野出黎洗乾再擺返入去.
半夜叫老公去訓先,第二朝要返工,唔好陪我嘞~~
點知2.幾好似貞子咁mau低行返入房,mau 係床尾伸隻手上去拍老公隻腳,
嚇死佢!哈哈哈,諗返都好笑!
好彩全程有佢咋,起碼痛起上黎有人比我mit隻手,遞下紙巾,安慰下ah.......
到今日成個人精神返曬,太陽出來了yeah!!又捱過左嘞!
老公話返比我聽,原來個晚我講得最多既係"好痛呀...嗚...嗚,真係好痛呀..嗚...嗚..嗚 .."
無嘞,跟住坐係到俟住度牆同老公訓到天光嘞~~~~

耍花槍~~天晴,少少凍

23號嘞~~好快新年嘞~~
尋晚同老公出左旺角攞鞋,都ok啦~~但未達到心目中要求,算啦~~~
好眼訓,有成兩日未繡過野,諗住抖到星期五攞到個架先再開工,真係太攰,要休息下,
尋日係公司,見到mc同mrc係到玩花槍,一返到黎先黎一齣大龍鳳,mc大鬧mrc:點呀..係咪睇下都唔得呀......關你咩事啫.....咁mrc只可以唯唯諾諾咁答:問下啫問下啫......呵呵....mc都費事啋佢咁款...
點知轉過頭比我企係到見一幕好震撼既場面,mrc係到撩mc講野,mc話關我咩事啫,mrc突然走過去攬住mc,仲mit佢個雙下爬喎,mc即時笑番咪啦,幾sweet sweet呀,點知mc見到我睇住,超唔好意思呀.........咁咪幾好囉~~~~
又引證左老公呢樣野係好有用既~~~~~搓圓禁偏咩都得呀!

生活必須品~~天晴

尋日終於都割左粒野嘞......
好驚....一路等醫生一路都好驚呀...醫生遲到喎....要我驚多8個字....
打完麻醉針開始已經想嘔,原本唔駛老公陪我入去做手術,但係到最後一刻都係扯埋佢入去,老公全程同我傾計,同佢傾左一陣問佢點解仲未做架?佢話已經攪掂嘞,嘩...真係咁快,一d都唔痛添.....
只係聯左一針,我好記得果粒松果形既肉粒,都幾Q架喎.....而家就口爽....諗番都不知幾驚........
黎緊星期一拆線,睇埋REPORT,希望冇野啦!
係今次過程中,我感受到老公呢樣野既作用,係好緊要既,女人唔可以冇老公,老公可以有多種用途,可以陪食早餐,可以用黎發洩情緒,可以用黎鬧下, 夜晚又可以用黎咩下,驚既時候又可以依靠下,仲有無限既用途,原來有老公係身邊真係人都會定D架........
老公....真係女人既生活必須品!