給最愛女兒的說話

給最愛女兒的說話 詞:鄭國江,鄭丹瑞 唱:曾路得 獨白:鄭丹瑞
緊握緊握的一雙小手
教我有著太多感受
你現在或是不解這一番心意
留在你童年以後
活著活著是永遠尋求
每個際遇要安心靜候
算了吧 人成長總有一些起跌
長路裡有我在背後
喜歡的不代表佔有
替彼方想多一想
世情易接受 如感迷途
不要徬徨 嘆息收起望以後
路上路上或挫折重重
每每挫敗也許不易受
要記著事事如不可以不必強求
難受處一定有
獨白:
親愛的女兒,今日我要講o既,
你可能永遠都唔會明白,
點解當父母認為愛你愛得過份的時候,
你會覺得我o地愛你愛得唔夠,
假如有一日,當你流住眼淚,
埋怨爸爸媽媽太唔了解你.
當你煩燥不安的時候,
請你靜一靜,想一想.
然後,希望你明白,希望你容忍,
希望你繼續,愛你的爸爸,愛你的媽媽.
喜歡的不代表佔有
替彼方想多一想
世情易接受 如感迷途
不要徬徨 嘆息收起望以後
路上路上或許多引誘
愛意決定你想施或受
這段話 寶寶很想你聽多幾遍
能共你心伴奏

99歲的媽咪~~一號波

早兩日沖涼時候呀囡問我而家幾多歲,諗住玩下咪答己經99歲,囡囡當時無咩點,只係話"係咩"咁?就係咁我地玩完一輪就食飯嘞....
點知第二日老公打電話黎話呀囡喊得好悽涼,攬住佢話媽咪99歲嘞.....就黎死嘞!跟住老公咪話媽咪講大話囉....但係呀囡唔信,因為佢覺得媽咪唔會講大話既!仲走左去攬住個印印姐姐係咁喊,喊到搐下搐下咁添......真係陰公....
後黎諗返至記得,佢話大人係有100歲命既啫....所以佢咁驚囉....
唯有返屋企氹返囡囡,話自己一時講錯左,媽咪有排都未99歲,好彩佢都信~~
小朋友就係咁天真!

畢業生

啱啱先話攪完個聯校結業禮,話咁快又黎一個畢業生表演比家長同老師睇既結業禮~~~
今次坐得好近,好好多.......
可以睇清楚d個囡囡,已經5歲嘞,好快......話咁快又升上小一啦,即係意味著佢要開始人生辛苦既第一步!
希望佢可以過得開心啦!
真係要求神拜佛,呀囡安安定定,乖乖巧巧咁大個女!!!!!!!

保良局之夢

折騰左一段頗長時間,終於都有消息.....
但係,仲要被一場黑雨玩下先安樂!
由6月5日開始,已經無胃口食野,一路等到7號,上天呢位大老爺又要玩下我地呢斑媽咪,黑雨喎~~~~~
公報先黎落雨,唔通連個天都唔鍾意我?
錯,只不過係上天盡情地洗乾淨條街,到8號出猛太陽被我地行出街啫!
8號呢日,好緊張......
一路係個 hall到等派小一註冊證,一路有家長想喊咁既樣,但係又有家長開心到成個人跳起!一個一個派到心儀志願,另一批就竟然去到第十一志願喎!
真係差天共地!
好彩!小蕙蕙最終都入到第一志願保良局莊啟程第二小學~~~多謝!!多謝!!
原來個天都係鍾意我既....呵呵呵....
我家大老爺好衰咁話:呀囡妳終於都圓左妳媽咪既保良局之夢!恭喜曬!不過戥妳將來辛苦~~~
哼~~~~咩呀!!!!

好唔開心.....天晴

好唔開心.....點解係都要拗呢?????
係咪一個大人要同細路爭到底呢????
家和萬事興,好難明咩????
就黎痴線......個心好唔舒服......
成日驚佢地一句唔埋就嘈交......
送走左個仔.....寧願少見個仔一面..都唔願見佢兩父子嘈交......

做媽咪既我同個仔講道理,要佢同爸爸道歉,當係大家睇錯左.....仔仔話知道....
但係爸爸呢?.......一句大大聲"唔滿意佢咁態度同我講野呀!""點解要我當睇錯呀?我無睇錯喎!"
我當堂眼淚直飆......係咪要做到咁呀......一餐飯食到一半個個食唔落.......
佢啱曬,咩都係佢啱曬!!係佢身上唔會有錯誤發生!
佢最錯係比我生左呢個仔!

點解佢唔可以當比個面我呢?已經整曬下台階.......
係咪要計較到底呢?
睇返上次日記訴苦已經係兩年前既事,精神已經極度緊張.....
好辛苦......仔仔一星期返黎一次.....每次我都好驚......好擔心.....
而家將會一星期都見唔到一日嘞......
因為我會叫佢一放學就去呀婆到住.....我會過去睇佢.....
唔知佢咁安落未呢?

我欠左個仔既心結愈纏愈實........

方方樂趣~~天晴

今日老公問左一個問題,好難答~~
比唔比個女去方方樂趣讀書呢?
國際學校......
好唔係唔好...但係要諗好多野.....教學方針.....升學....前途......啱唔啱個女既性格呢?
最要命係搭車呀,屯門出九龍塘,諗下都覺得攰呀!
一係學孟母三遷,為左個女全家搬出去九龍區,唉....無啦啦比條咁既問題人地諗,想點?

細路仔樣,大人思想~~天晴

又到左月尾既日子~~

今個月好快手咁完成手頭上既工作......唔知係咪因為有約會呢?

尋日一放工就返屋企,小蕙蕙就已經好開心咁拉住我傾偈,佢好開心呀,因為佢要代表學校參加校際歌唱比賽,佢好緊張,又講比我知要化妝要換一條紅色既短褲仔,睇見佢笑到咁,都比佢感染到小小緊張添~~~唔知佢會唔會怯場呢?

跟住仲同佢傾到將來既問題,佢既志願改變左嘞....

1.警察

2.飛行服務隊機師

3.護士

4.的士司機<-- *.*"

我好似呀毛咁同佢講,做咩工作都好,生活背景都好緊要,千其唔好做出一d影響個人操守既行為,初初諗住佢唔會好明.點知佢好明白我講咩道理,佢識答:如果將來做左d唔乖既行為,公司老闆係唔會請佢既!讀書叻叻都冇用!

好野呀下,而家d細路真係估佢唔到~~~~

我真係好鍾意同小蕙蕙傾偈!

細路講野同思想都好直接,唔會轉彎換角,大人反而會學到野~~~~

揀揀揀~~~天陰,寒冷天氣警告

好凍呀~~~得10度咋,水喉d水仲凍過雪柜d水呀!
隻手撻傷口已經第五日啦,冇咩痛啦,只係有少少紅紅地,不過真係好核突呀果條黑線......
聽日又要再揀小學,好煩惱~~~~點好呢?好多野要考慮,最驚到頭來千揀萬揀,揀著個爛燈盞!
嫁錯老公都話可以立即離婚,幫細路揀錯學校,真係難攪,一轉校,其他學校就會諸多阻撓,考完呢樣又考果樣.......唉........

養不教父之過,甚麼是教呢?~~天晴寒冷

死者是近年吊頸喪生事主中，年紀最小的女童。○一年十月，比她年幼兩歲的童吳迪瑋（七歲），疑因中文默書不及格，在元朗朗屏錦屏樓，留下一紙「自己默書不合格，對不起爸爸媽媽，保重身體及照顧自己」的遺書，在大廈走廊墮樓身亡。
睇到呢段新聞,心好酸....亦都覺得好難做人父母........
過份呵護,會變成溺愛~~令到小朋友不懂成長
放鬆管教~~又怕佢拖懶自己
緊張學習~~又怕對小朋友造成壓力
小朋友既心事真係好難捉摸,佢地年紀細連帶心眼都細,小小既事發生左,對佢地黎講可以係天大既難題......佢地唔需要接觸社會,所以默書都可以睇得好大,因為呢d就係佢地既生活責任......
我成日都提住小蕙蕙,要佢記住自己既責任係咩野,小蕙蕙亦無時無刻記住:我既責任係努力讀書,聽老師既說話,要孝順父母家人,乖乖地個小朋友~~
而家諗番轉頭,我係咪比左好大壓力佢呢,老公成日都叫我唔好咁啦...個女頂唔順架.....
我係咪要放鬆自己先呢?
對michael仔我唔會再話:你大個啦,你應該要點點點........你仲細,等你大個先會明咁,而係會改口講:嗯.....你呢個年紀,應該可以做到架嘞.......效果又幾好喎,我可以從身心發展解釋比佢知對與錯,係跟兒童心理學既書做架,起碼唔會令到小朋友誤解,一時話我大個一時又話我細個,咁到底大定細呀?全部都係妳地d大人講曬~~~
教細路點解咁煩架~~~ help~~~~