送別2007~~天晴寒冷天氣警告

2007年終於過去啦~~~~~
係呢一年入面有好多突發事件出現,簡直令人措手不及......
呀女升高班,呀仔升中二,好忙好忙.......一個講野有d障礙咁款, 一個成日整到損手爛返黎,冇佢地付,
老公呢, 仲大件事,腎衰竭添,好突然呀,係我再三叫佢睇醫生既時候發現架,跟住仲一年入左三次醫院添,又要插喉又要放腎積水咁,腎功能得番唔夠三成,要錫住用 lu.....唔係好快冇.....
我自己本身冇咩特別事發生係身上,但係屋企人發生既咪即係自己發生囉,一家人麻......
但係...呢一年真係感覺成個人精神插水,好攰呀, 人既外表都老左好多好多~~~~~
不過...呢一年係開心日子多過唔開心既!!!!!
黎緊2008年希望大家都身體健康,開開心心!!!!!!
老公身體健康
小蕙蕙繼續聰明伶俐
MICHAEL仔就安安定定
毛貓心想事成,想肥就肥,想瘦就瘦,
葵葵快人一步理想達到
小儀依然咁爽
大姐LING要幾靚有幾靚

HAPPY NEW YEAR~~~~~

平安夜~~天晴潮濕

今日收到葵葵親手整既聖誕節餅人,好Q呀!真係唔捨得食呀,好似葵葵咁樣,有黑眼圈架~~~~


葵葵真係好有心, 年年都會整呢D手作仔比我地,我記得好似連情人節都有架!!!hehe........


希望佢出年唔止整比我地食,仲真係整比情人食啦~~~~~




Merry X'mas~~~~~~~
and a happy new year~~~~~~

又生日啦~~35歲 lu~~~~天晴

又生日啦~~35歲 lu~~~~
公司一斑妹妹仔同大姐 ling佢地比左個驚喜生日我~~係驚青個驚喎~~
首先毛貓攪錯食飯時間,佢可能好肚餓定嘞!仲要話比人知我12點走喎~~~
ling 姐係毛貓錯誤引導下,提早叫埋我入去房仔,點知大姐ling個樣鬼咁嚴肅,問佢咩事,佢話出事嘞呢次~~真係比佢嚇死,係呢個時候小小儀攞個 cake出黎喎,我忍唔住笑出黎,真係好驚喜呀!!
但係我地又好驚mc返到黎,所以啦啦聲收返埋個cake入雪柜,好似邵逸夫生日咁呀,要綵排一輪,哈哈哈,咁大個人都未試過要綵排一個生日會,原來係咁樣既,呵呵.......
點都好~~~真係好多謝妳地呀~~~
排名不分先後 :多謝小儀,多謝葵葵,多謝毛貓,多謝林玲,最後要多謝維琪,唔記要多謝邊個嘞~~實在太多人嘞,嗚嗚......多謝大家..出年我會再努力......多謝多謝....

粉撲專用洗劑~~天晴大霧

尋日試左呢個美顏新玩意......洗顏素材主体專用洗劑.......

吉之10蚊店貨仔
超好用超清潔囉,以前用過好多隻都洗唔乾淨個撲,點都有漬,好唔乾淨!但係呢支就一jit一洗就嘩嘩嘩聲super!!!!!!用清水一過,即刻變返白豬仔,靚曬~~~~

清洗前

清洗後

嘔血~~天晴

尋日放工同LING姐MINNIE落左元朗買迷妳電飯煲,果個PROMOTER真係唔掂,SALE野唔掂,計數仲大鑊過毛貓,計少一百蚊都夠膽死!仲要追到出LIFT口搵我地攞喎,等我同LING空歡喜一場,不過價錢都係我預算範圍以內,但係個PROMOTER就慘啦, 比4個收銀追住鬧,係起勢咁鬧喎!冇停口既意圖,唉.....佢都係新移民,所以慢少少蠢少少咁啫,冇心既,駛唔駛咁鬧法呀?
另外係返搭輕鐵返屋企途中,坐係我對面既一對母女, 真係睇到眼火爆,呀媽不停讚個女叻,成日攞100分,考試又高分,又話佢身邊果D係豬朋狗友唔好群埋去,初初聽到都冇咩野,講講下離曬大譜,用錢黎衡量每次分數既獎品,媽咪話20蚊,個女話要50蚊先得,先可以攞高分D喎!!!!!媽咪話"妳成日都攞到100分架啦,冇咩特別喎,點比妳呀?"跟住呀女話"吓!唔比?我攞曬妳D咭去碌爆曬佢!哼!",我地成車人都打曬個凸,佢媽咪仲離譜,話"妳識簽我個名咩?"個女話唔識,佢仲要親手教埋個女點簽佢個名喎!咩人黎架,點做媽咪?天呀!咁都得?

蚊上癮?~~天晴

呢排唔知點解大家好想修眉,我係尋日就幫三位美女修眉,其中葵葵發生血光之災,比我一mit就mit損左眼尾一忽仔,流血呀~~~~~~~~~~~oh,mygod!!!!sorry呀~~~~~
實在太攰啦隻眼,下次唔會啦,呵呵呵....
最得戚係毛貓,竟然好快口咁叫我幫佢蚊眼尾幾條眉尾喎,叻嘞而家,唔怕痛嘞,仲識同維琪講要靚麻唔痛既~~可以再蚊多d添€咁喎!唔通佢蚊上癮?都好既,難得佢肯扮下靚......
女為悅己者容,中曬!

元朗小肥牛辣到飛起~~天晴

呢排係咁食野,仲要冇辣不歡添!個肚終於都肚疴啦,一晚去幾次廁所,都幾辛苦~~~~
尋晚又去左元朗食小肥牛,間舖頭細細,咁啱又撞到熟人,不過冇咩優惠,我地order左個鴛鴦鍋,好彩咋,一邊麻辣一邊皮蛋清湯,個麻辣真係辣到飛起,正呀!食到係咁喊~~~~LINGLING 一定啱食!
咁多款邊爐料,個芝士牛丸幾好食,但係個鵝肝墨魚丸就酥到嘔,超難食呀,冇下次!
仲有食左個從來都未食過既炸腐皮,好好味,口感好得意,推介!
不過席間我地仲食左條活石蚌刺身,個條魚仲郁郁下架,見到都想嘔,好恐佈!我最終一舊都吞唔落,NEUR返出黎~~~~
跟住我地仲帶vicky去左元朗地標B仔涼粉食野添,我地叫左個大B仔一齊食,呢個B仔真係好難攪,都唔知點不落個碗到好,呢曬HAIR,最後我地個個都抱住個肚走,遮得既遮,收得埋既收埋.......個肥肚!

北上食小肥羊~~天晴

唔怪得老公會成日話我唔好做埋d咁既野~~~~又比佢訓話一番~~~~唉
算啦~~~下次唔會架嘞~~~~
今日約埋大姐ling細ling小儀安娜佢地北上食小肥羊,同埋行街街,好開心呀!
唔知會有咩發生呢?
大家都做好準備, 除曬身上睇得下既野,安全至上好d~~~~

蜈蚣彈~~天晴

衰毛貓,係打羽毛波中場休息其間,竟然學人玩蜈蚣彈喎,我係到飲緊水,比佢攪到我即刻噴水,哈哈,真係笑到肚 luen,唉~~攪到周圍濕曬~~~
打完波仲要約埋細 ling行街買補品整面,最後去左資生堂玩左個肌膚test,oh~~~~我係A-F級入面,竟然係E級,係尾二呀,除左彈性仲好好之外,冇樣野合格,缺水缺油,塊面珠超乾,唉~~~點算?
有樣野令到我好驚訝,就係SALES小姐,我只係買左一支百六蚊既BASE同一個捷毛夾,但係佢都超好心機超好禮貌,唔同一般化妝小姐咁,佢會幫我攞住袋貨送到我出門口,講 BYEBYE,再黎一個90度直角鞠躬禮講多謝下次再見~~~嘩~~~我同細LING都好驚喜,真係從來未係香港見過,好日本FEEL呀!!!雖然呢D都係銷售手法之一,但我會因為佢既禮貌而再幫趁,如果香港間間美容公司係咁就好LU......唔好下下都好似貞子纏身,死咬住唔放!

精彩12月~~天晴

一踏入12月D節目就排山倒海咁黎,今日收到紅色炸彈一封,係老公個表妹12/1結婚闔府統請,黎緊18號係我自己第35個牛一,22號呀囝牛一兼冬至食飯,24號平安夜約左一家人去迪迪尼食步飛,29號呀奶奶唔知幾多歲既大壽要一家人食飯慶祝一下,到31號元旦又要同D囝囡睇煙花,好似好多節目咁,都好既,唔駛咁悶.....不過$$$就估計要用到接近5位以上,好貴呀,而家香港D衣食住行全部加曬價!就黎100蚊只可以當50蚊駛~~~~
如果黎緊真係約得成佢地北上食小肥羊就好嘞,比細 LING講到直頭想即刻起程北上......
"渦MARK","肥羊粉","郁耳馬",嘩...哈...哈..哈~~~~~

燒賣的誘惑~~天晴寒冷

燒賣的誘惑真係大,令到毛貓一食就停唔到口添~~~


佢採用左"咬"既方式黎食粒燒賣,真係好好味咁款喎,仲比我幫佢捕捉到一剎那既滿足表情添,請欣賞!

左一粒右一粒咁 , 食既滋味睇既開心,
不過,佢係喺冇超卡既情況下食架,值得支持鼓勵!

避年~~天晴超乾

外出天氣好好,但係濕度就超低囉!
近來塊面已經係咁起曬紅印,呢兩日仲同細 ling去屈人寺買左兩塊媽屎用下,9.9一塊仲係買一送一,底用呀,果日細ling行街起勢咁睇野仲想係咁買野添,唔叫住佢,佢肯定破產都有份......
不過講番轉頭,後生有能力既話, 真係要想做既就做,想扮靚就去扮,係啱架,唔通老左先黎扮咩,
而家d商場已經充滿聖誕節氣氛, 係人見到都開心,我仲諗住book定步飛同兩個細路去玩玩食食,等佢地開心下,不過真係好貴呀.......又要用錢.......
今年過得比上年仲要快,話咁快又聖誕節,咁咪好快新年囉?慘慘慘又要派利是,不如過大海避年,可唔可以番d利是錢呢?呵呵呵.....

小學頭輪派位~~天晴,返大風

小蕙蕙小學頭輪派位抽唔中,好擔心,雖然心知唔係要追求名校,只求校風好,但係往往校風好就係band 1,爭到頭崩額裂咁款,但係呀女一分都冇,點爭?周邊老師同c9既意見係第二輪再接再勵,一樣有機會,唔知點算好...呢d野只有自己先可以作決定,其他人一定唔敢比意見,真係諗到頭都實曬,最慘我係一個悲觀主義者,樣樣事但願安穩唔駛諗........一要諗既野就好似攞我命!
不過,我有一個堅持,就係就算而家呀女入左第二間小學都好,將來我都會繼續幫個女再申請入保良局既小學,一年唔得下年再試,一路試落去!!!!!!!!!

唉.........天晴,心灰

唉............
唉............
唉............
唉............
唉............
唉............
想點呀,點解呀?????諗到頭都大埋.......

開心十一月~~天晴轉涼

呢幾日天氣轉凍左,好似唔夠衫著咁, 但係應該夠既...係我冇去搵出黎啫!
十一月真係好多人生日呀, 一個接一個,年尾好似特別多開心事咁.....
捱過左炎夏, 天氣轉涼,公司d花花陸陸續續開始有花蕾,盆盆都等住開花, 正呀!
但係屋企盆蘭花就仲未見到有num,上年呢個時侯已經開始有野睇, 唔知係咪轉左環境所以唔開花呢?
小儀黎緊廿三號牛一, 仲會過大海添.......真係好,近近地但係又有行開過喎,攪到我都好想去呀!

大懶蛇~~~天晴

啱啱先消化完前日元朗夜遊既野食......
好似條蛇準備冬眠咁款,食飽飽先捐入窿,
而家又成日諗小肥羊嘞,唔知係咪前晚一心抱住食辣辣魚, 點知失望而回既原因呢?好想食呀!
今日要去惠康買包小肥羊返屋企拾下拾下先得,止下咳先~~~~~

我要打好呢個波!~~天晴

死死死!!!!!
打一日羽毛波已經成身散曬,仲唔知醒返工添!
不過話時話,打波係攰少少, 但係個人精神左,仲好好訓添:p
打羽毛波真係好玩過跑步呀, 起碼係互動,唔會好似跑步咁一個人玩,同毛毛,大姐玲,葵葵,小儀,緯其呢d國家隊成員打一場,真係正呀,有姿勢有實際!
我要打好呢個波!

開心星期日~~天晴

今個星期日係好耐都冇試過既假期,因為仔仔同小蕙蕙約左呀姨去海浪公園玩,屋企得番我地兩公婆係到,悶到嘔呀!小蕙蕙係出門口前仲話比爸爸知:我去玩啦,今日唔得閒倍你嘞,叫媽咪倍你玩啦,知道麻? 真係攪笑,好似佢係大人咁款~~
食完早餐,已經係到諗去邊樹打發時間,大澳啦,長洲,梅窩,尖咀,旺角........老公仲問我有邊度香港名勝未去過,真係諗到頭都大埋,最後我選擇左去尖咀行citysuper,跟住直落去行街,老公睇電器,我睇廚房裝修家具,真係好多野睇,果d雪柜,洗衣機,焗爐,電磁爐睇到冇停手,樣樣都係被我度揭黎揭去,好似有心買咁款,但係我都係睇下啫,睇下而家d家品有咩功能同款,唔買睇下都勁開心呀!
最開心係同老公去左i.t到睇衫睇鞋,睇中左對boot,但係一睇就知唔啱著,老公叫我買大d,我話我唔會咁盲目去買野,啱就啱唔啱就算,佢竟然問我點解唔去造鞋,真係一言驚醒,但係造一對鞋真係好貴架,下下成千蚊,真係有d唔捨得,點好呢??

熱戀~~天晴

<當女律師指Ｘ已屆中年，熱戀可曾令他回復青春時，X更帶笑指「任何人開心的時候，包括大狀你，都會感覺年輕」，引得庭上連同法官在內的男士同聲一笑。>
以上一段對話 ,令我更加肯定一對夫妻或情侶一定要時刻保持菲傭口頭蟬:新鮮~~
果個X係一個中年香港高官,有十二萬蚊一個月,有長俸,有個靚老婆,唯獨欠一樣野,就係新鮮感,一段廿四年既婚姻,被一個相識唔夠半年既36歲女人破壞,到底真係男人既錯定係女人一定冇錯呢?

光陰偷走~~天晴乾燥

呢幾日係往返屋企同公司途中, 發現少少自然定律,係搭lift大堂見到一隻蝙蝠一隻大草蜢各自伏係一度牆上面,好靜好靜,郁都唔郁,行經幾日都係咁樣, 令我諗到佢地係咪等對方先郁呢?真係敵不動我不動?
但係天氣日漸清涼,佢地又冇野食,點捱落去呢?到時咪棧一齊攬住死~~
有時人都係咁諗: 你郁我就對付你!哼!!
對方又會咁諗喎 :我唔郁你攪我唔到!吹咩!!!
係大家專注對付大家既時候,光陰已經慢慢偷走左~~~

魔鬼來臨~~天陰有雨

今次去返傳統街市買雲吞皮,一定掂~~~有時呢d野真係傳統既好d!
係落雨冇地方好去既情況下, 係惠康買左生果返屋企整沙律, 仲買左支惠比沙律醬用 , 冇咁酸都好好食喎.
今日又係哈佬喂,唔知幾時開始, d人將呢個節日當成大日子咁攪,仲要好有氣氛喎,雖然呢一日係外國係d鬼魂返回陽間既恐怖日子,但係香港人就將佢變成歡樂既節日,好野呀吓~~~但係天主教好似好反對慶祝呢個日子,好似話係歡迎魔鬼來臨咁話喎.......
其實都冇咩所謂啦,開開心心又一年,11月打都後會好多節目嘞,真係好呀!

小蕙蕙尋晚已經好興奮咁期待天光,因為佢學校攪左個萬聖節party呀!

尋日諗住包d雲吞比毛毛食, d料己經撈好曬,仲用左係吉豬買既雲吞皮包添,點知d皮好睇唔好食架,一煲起已經溶曬, 得番粒餡係到,攪咩呀咁都得, 係咪特登設計成咁!!!!!

無謂野~~天晴

大老爺又入左醫院, 呢半年已經出出入入幾次......
佢身體愈黎愈差嘞,好多粗重野都唔可以做,心情自然down左d,
佢仲要傻到諗我得果三十幾歲, 第日得番我一個人點算喎,驚冇人照顧到我,可能人到有病既時候就會諗好多好多無謂野,冇一個人會例外~~~~

美食嘉年華~~天晴

因為我無名個整野食 blog我入唔返呀,所以呢幾日掛住係y!blog到整返d野post上去,又搬一次屋!到今日都未搬完呀,唔知要整到幾時呢?
其實呢排都整左好多野食 , 不過都唔得閒post上黎, 而家一次過蘇曬出黎先~~

意大利陳年黑醋

芒果紐約芝士

新會柑同曬果皮

手打腳踩烏冬,超滑滑呀, 食到啜啜聲~~

紫菜雪芳

秘製莎牌辣椒醬

杏仁豆腐花

新玩意:狄康1400ml全自動豆漿機

蜜汁豬肉乾

公司秋季旅行

明天同埋佢地成班人去釣墨魚,好開心....秋涼攪番d戶外活動真係好!
當係公司秋季旅行~~~
呢個團都算攪得有難度 , 因為要十幾人先成團呀!
下次去國內食野團唔知會點呢 , 而家個心又已經飛左出去嘞!!!!!

vichy+雪耳~~天晴,乾燥

同玲姐去買左細ling介紹既vichy,我同大姐玲夾份買黎用,用左一日都ok良好,咁覺真係幾水喎~~
呢兩日食番d雪耳糖水, 感覺身體入面舒服左好多, 冇咁燥lu......
以後都要 keep住食, 日日食,希望第日唔駛靠面霜都可以見得人啦!
而家我仲密謀緊買個新雪柜,可以擺我個d芝士呀, 鮮奶呀,啫喱呀,淡忌廉呀,仲有其他製成品添,唔駛再擔心而家個雪柜一日凍一日熱嘞~~~不過都係過左農曆新年先買lu , 到時手頭鬆動d麻,唔駛就住就住咁~~~
終於都甩難,唔駛再咩住層蟹樓!

花膠雪耳雪蛤糕~~天晴,三蛇肥

尋晚終於發好d花膠,其實已經浸左兩日咁耐,雖然有人話自己食唔駛咁麻煩發咁耐 , 但係我都係怕左d腥味 , 所以辛苦d都要做!我已經搵九百幾蚊一斤果d"公"黎買(有d真係太貴), 聞落都唔係好腥 , 好彩啫,如果唔係真係曬心機捱眼訓整咁耐~~
秋天一到 , 人就咩肚紋,皺紋,嘜紋物紋全部都走曬出黎,比細ling提一提 , 真係要入急症室抖一抖先得 , 如果唔係真係提早 變呀婆~~~
花膠雪耳雪蛤糕咩都出齊先得,
多謝細ling 既老實相告,等我唔駛懵懵下!

相遇 , 不是用來生氣的

在網上文章看到這樣一編散文~~我發覺我有時也會這樣傷害他的心.....

往回家的公車上，轉程靠站時，乘客頓時多了起來。一對上班族男女恰巧在我身邊，吸引了我的目光。可能因為人多，男的不時地將手臂圍住女的，並輕聲的問「累不累？」「待會想吃些什麼？」
只見女的不耐煩地回答：「我已經夠煩了，吃什麼都還不先決定，每次都要問我。」
男的一臉無辜的低下頭，而後說了令我印象深刻的話：「讓妳決定是因為希望能夠陪妳吃妳喜歡的東西，然後看到妳滿足的笑容，把今天工作的不愉快快暫時忘掉。我的能力不足，妳工作上所受的委屈我沒法幫妳，我所能做的也只有這樣。」女的聽了後，滿懷愧疚的說聲對不起。
男的這才似乎重燃信心般說：「沒關係，只要你開心就好。」而後親吻了女的頭髮。
下車前再回頭看看這對情侶，男的依舊保護著心愛的人。
這樣的情景，讓我覺得自己今天同樣在工作上有些許不愉快，如果沒有聽到這一段對話，回家後的我，可能也是一副全世界都對不起我的臭臉面對心愛的人，只在乎自己的委屈，卻忽視對方的感受，不自覺地傷害最親密的人。
所以在踏進家門時，我告訴自己：難道我要像公車上那位女孩一樣忍心，將自己的不滿委屈帶給身旁的人嗎？
不，我想我現在應該做的是：別再把工作上的情緒發洩在心愛的人身上，破壞了最親密的關係，並且主動給自己一個微笑。
相遇 , 不是用來生氣的 , 說得真好!

力量~~天晴

公司既空氣污染指數超標 , 怨氣很重 , 何必呢......
憎恨唔講出口 , 永遠都冇憎恨既全在
憎恨講左出口 , 永遠會被憎恨操縱~~~
係咪真係咁一無是處呢?
但係我接受得到,亦都願意接受,因為自知力量有限,游唔到出大海!

唔知做咩~~天晴,秋風起

尋晚係屋企整左個終極咖啡蛋糕比毛毛食 , 等佢好過冬~~~
唔知係咪好耐冇焗蛋糕關係, 硬係唔就手咁既, 算啦, 食唔死人既, 哈!!!
呢排唔知做咩 , 仲之就係唔知做咩~~~~
我既生理同心理質素要進修啦 , 如果唔係會外表三十六入面六十六嘞,係咪有好既生理自然會有好既心理呢?

生命的功課

生命的功課

有一個人，他有四個兒子。
他希望他的兒子能夠學會不要太快對事情下結論，
所以，他依次給他四個孩子一個問題，
要他們分別出去遠方看一顆桃子樹。
大兒子在冬天前往，二兒子在春天，
三兒子在夏天，小兒子則是在秋天前往。
當他們都前去也都返家之後，
他把他們一起叫到跟前形容他們所看到的情景，
大兒子說那棵數很醜、枯槁、扭曲。
二兒子則說，不是這樣子，
這棵樹被青青的嫩芽所覆蓋，充滿了盼望。
三兒子不同意，他說樹上花朵綻放、充滿香氣，
看起來十分美麗，這美景事他從來不曾見到過的。
小兒子不同意他們三人的說法。
他說樹上結滿了果子、累累下垂。
充滿了生命果子與豐收。
這個人就對他四個兒子說：你們都是正確的。
因為你們四個人是在這棵樹的四個不同季節前往，
並且只看到其中一個季節的風景。
他告訴兒子們不可用一個季節的風景來評斷一棵樹或是一個人，
關於構成一個人是怎樣的一個人的要件，還有一個人生命的
歡愉、喜樂、愛，只能在他生命的盡頭時候來做衡量。
當你在冬天時候就放棄，你就會錯過你生命春天的盼望、夏天的美麗、秋天的收成。
不要讓一個季節的痛苦毀掉其他季節的喜樂。
不要因為一個痛苦的季節就對人生下結論，

持守忍耐度過這段艱難，美好的日子將在不久之後來到。

近朱者赤近墨者黑

原來近朱者赤近墨者黑係真架 , 同老公行左一陣街 , 坐低係茶餐廳食野,我見到一個身形稍肥 , 短頭髮但係亂曬籠好似冇梳過頭出街咁款 , 一件超緊身t恤 化身米芝蓮,一條有漬牛仔三個骨褲 , 一路食野一路講野 , 我問老公 , 你覺得呢個女人烏唔烏 wear 呀,佢答唔覺喎 , 嗯.....我話原來你既要求係咁低既.....唔怪得我會愈來愈唔理自己打扮 , 唔理自己頭髮啦!
女為悅己者容 , 連身邊人都唔需要自己去打扮一下 ,自然會放鬆下來...
我話比佢聽 , 我近排發覺自己太似黃面婆,太不修編幅啦 , 自我形象極低 , 我問佢知道嗎?佢竟然答唔係呀妳仲好靚喎 , 我真係比佢激到死左 , 就係因為你冇要求令到我咩野都是但啦 , 36歲已經攪到今日咁既款囉 , 連果個小肥肥師奶都話ok既 , 我係你心目中點唔會唔ok呢 , 係咪!!!!!!
女人千奇唔好信自己男人講既 "ok喎", 要跟隨返自己想扮靚就扮靚既原則 ,買衫行街要自己行 , 唔好約埋佢 , 妳問佢件衫靚唔靚呀 , 佢只會答ok喎 , 化個妝唔駛問佢靚唔靚 , 佢又只會答ok喎 , 我老公仲衰 , 我如果有日心情好扮靚靚同佢出街 , 佢會問我妳去飲呀 , 去街行下咋喎 , 聽到想死呀我!
女人唔一定要有街去, 有場合先可以扮下靚 , 係平時返工,去買餸, 去樓下百佳都可扮到好靚架!!!!!!!
36歲咋 , 係時候要修理一下自己~~~~

過期~~時晴時雨

呢排心情真係麻麻~~好似天氣咁 , 話變就變!
有時d野真係要睇開d , 但係講就容易做就難 ,
天下無難事 , 只怕有心人<----我就係果個有心人嘞!
又到月尾 , 不過都係冇心機做野 , 拖字訣....又一個月~~
屋企雪柜d材料亦因為我既拖字訣而難逃厄運, 掉落垃圾桶 lu....
通通過曬期 , 竟然連檸檬都係咁 , 我老公話我咁都得?
橫掂已經出左毛利 , 咁就呢兩日整蛋糕啦.....
整咩好呢?定係整 p sa 好呢?

尋晚同蕙蕙一路睇電視一路食冰皮月餅 , 初初食皇牌綠豆芒果味既時候都好正 , 點知食食下 , 小蕙蕙好大聲叫左出黎"救命呀媽咪"!我比佢嚇一嚇, 望下佢做咩 , 佢好驚咁樣望住我話好驚呀 , 原來佢見到手上果個士多啤梨味既冰皮月餅 , 咬開一半之後見到入面紅卜卜好似血咁色 , 佢咪驚囉 , 問我點解咁多血喎 , 佢真係驚到失失慌 , 笑到我肚 luen.......我見佢個樣咁驚真係忍唔住笑,不過個月餅真係好核突架 , 駛唔駛用咁多顏色呀?紅到咁都得~~~直頭好似紅色印台果種紅喎!

新玩意~~天晴

好多謝細ling比左40個Q傍我去"千零"個度換機,係一部麵包機同一部雪糕機黎, 恨左好耐~~~~嫌佢太貴冇買, 而家有得平一半, 真係好開心!!唔知幾時有威馬豆漿機換呢?又係好恨~~~
而家仲要勞煩LINGLING同我試下部機 , 出黎佢同皇后都話好好食, 咁我都放心D......
嗯...以後可以食冇添加既麵包啦 , 如果有心情既話:P~~~~

bid bid bid~~天陰

呢排都唔知攪咩鬼, 成日都冇心機做野 , d野唔堆到死線都唔清左佢 , 呢個星期仲鬼咁多節目添,中秋啦, bbq啦 , 去街啦 , 百足咁多爪~~~個心又成日想整野食 , 已經買曬成屋野準備開波 , 整咩先好呢?
不過 , 呢排最興係上網bid一d係街唔會買既野 , 好好彩買親既野都對辦 , 所以都有d信心買,而家同小yee想買d好貼身既野玩下 , 唔知係唔係真係反地心吸力呢?如果唔係係街到........ :p肯定笑死人 , 呵呵呵~~~~

煲劇情緣

終於上網bid左套雪兒 , 返到屋企同個女一齊睇 , 估唔到琛蕙都咁鍾意睇喎,
直頭好似我煲韓劇咁款 , 不停咁睇 , 爸爸叫訓覺都唔肯 ......
諗下諗下都幾得意 , 係我十歲仲係學生既時候睇過既一套卡通片,今日三十幾歲人竟然同囡囡一齊睇 , 感覺好得意~~~仲係要攞曬綿被同零食一齊睇果隻, 哈哈......
爸爸話唔知我地有咩咁好睇 , 我話呢d係我同個女將來既集體回憶黎架.
今日返去再煲過 , 仲有好多集碟未睇呀~~~一定好眼訓~~~~~

性格測驗~~天晴

呢個係我跟 CONNIE玩既結果 , 真係超準呀!!!!!


平和型（隨和豁達，樂天知命）

您通常是溫暖、友善、忍耐、隨和、不好競爭，以及愛說話。您偏好和平、有組織、可預期而舒服的生活。您喜歡配合環境，因而很難知道自己的優先次序，變成跟隨別人所希望而去做事，有時候甚至模仿別人說話的腔調、用詞，以及身體語言。

優點：非常主動，具有眾多興趣和嗜好。您喜歡與人為伍，可以為了別人而發揮最具生產力的工作成效。

缺點：您會「自我遺忘」，失去了什麼是對自己真正重要的覺察, 妳很 容易分心，即使一個人時，亦有可能把高度優先的事情留到最後才 做。看起來很像是拖延，但並不故意。

愛情：您一旦擁有了關係，不會想到分離，而且會承諾去經營恆常不分離的關係。您既忠誠又慷慨，可以不帶妒忌或競爭心去支持並慶賀伴侶的成功，當伴侶的需要浮現時，更能給予回應。
您的憤怒最有可能在親密關係中顯現。因為當您迎合別人時，自己就消失了。「我有好長一段時間不知道自己的感覺，總是一片空白。當她投射出她所認為我感覺到的事情時，我們便陷入爭吵。我痛恨這種情形，但是對於引發我找到自己想要什麼確實有幫助。」

安定方位：成就型在安定的狀態下您會變得很專一，能在短時間內完成許多傑出的事。

壓力方位：忠誠型當面對感情的壓力或情緒對抗時，您會變得充滿恐懼，意識到所潛在的威脅，不但變得退縮，甚至唯命是從、好鬥、彆扭而且更頑固。

建意：問問自己的想法，而非顧慮別人的意見注意您對改變的不適感，學習歡迎新事物。注意您的頑固和被動式抗拒
最渴望：和洽相處
最恐懼：有紛爭，有衝突
最難達到的美德：果斷 (Right action)
最難克服的執念：懶惰 (Sloth)

悶到發火~~天晴

半夜走去炒湖南辣椒醬 , 但係個爐頭真係太高啦,攪到我都炒唔得耐!
手都跛埋 ~~~~
睇到手頭上既工作 , 好想一把火燒左佢!!!!!!!!!
要悶到幾時?

小福星~~天晴

日子仍然是依舊,如軟禁般的生活~~
表面輕鬆 , 內心沉重,兩年的日子真是難捱!
每日都是從密封的木箱中的一條小縫唞氣 ,這條小縫就是我的一班好同事,
全靠她們 , 我的日子先可以過得好些~~~起碼不用思考太多問題,嘻嘻哈哈亂講一通又一日,不用每下子都要正襟危坐,看到玻璃窗那邊的面色,真叫人想死!
若非有協定 , 我斷不會捱到兩年 , 希望因為子女的學校生活可以令日子快些過去,看到他們的校曆表,假期一個接一個 ,活動多到離奇 , 好彩有兩個小福星喔~~~~

.......~~天晴

已經踏入抑鬱症同焦慮症的中間線 ,DR.的意見不無道理 , 對事物失去興趣，沒有動力做任何事情食慾不振或過強各種不適，例如頭痛、頭暈、腸胃失調等,會痛到嘔的經驗 , 真係辛苦到極!
感悲觀、無助、絕望, 難以集中精神,思考困難、思想緩慢 ,記憶力退減、善忘 ,缺乏自信、難作決定 ,內疚、自責,有罪疚感,小便頻密、女性經期不規律~~~唉........雖然反應未至強烈, 但要多加留意控制情緒.

九型人格take2~~月全蝕

九型人格分析

第九型	和平型、和平者、和諧型、維持和諧者 17%
第五型	智慧型、觀察者、思想型、理性分析者、思考型 16%
第六型	忠誠型、忠誠型、尋找安全者、謹慎型 14%
第四型	藝術型、浪漫者、自我型、憑感覺者 14%
第二型	助人者、全愛型、助人型、成就他人者、博愛型 11%
第七型	快樂主義型、豐富型、活躍型、創造可能者、享樂型 10%
第一型	完美主義者、完美型、改革者、改進型、秩序大使 7%
第三型	成就者、事業型、成就型、實踐型 6%
第八型	領袖型、能力型、挑戰者、保護者、權威型 5%

我的九型人格分析？

呢個就係我第二次玩九型人格既結果 , 結果冇太大出入,不過知道今次第五形(智慧型、觀察者、思想型、理性分析者、思考型) 同第九形(和平型、和平者、和諧型、維持和諧者) 只係相差1%,我就覺得好準確 , 我最近所發生既事 , 其實已經令我心態改變不少 , 萬般皆是命 , 半點不由人~~灰~~~

我最憎人樣樣都睇到好灰 , 但係我今日又係咁~~~,咁咪要好憎自己囉?

九型人格來源 :http://tungisland.googlepages.com/article060.html

巢皮生菜同大菠菜~~天晴

又到星期一 , 好清閒既一個星期......
手頭上既工作可以偷偷放低 , 但係放低左之後又會覺得百無聊賴,都係速速攪掂佢!
睇到座位側邊既花花 , 真係好似一個花園 , 應該係收容所 , 一d身染重病既都送左入黎休養......connie個盆巢皮生菜都係到浸緊水 , 生番d新鮮根出黎啦 , 應該冇事既......
毛毛盆大菠菜又開花啦 ....
個d咩巢皮生菜同大菠菜都係我幫佢地改既名黎架 , 植物都要有名有姓先得架麻 ,收養得佢地就要當係親人咁看待先得!

假如可以從頭來過~~張小嫻

你曾經有這種遺憾嗎?事情發生了一段日子之後，你想，如果讓你重新處理，你會處理得比當天好一點。你當時太不成熟了。也許，你太天真了，太年輕了，太意氣用事了。當事為甚麼那樣固執呢?今天回首，那件事並非那麼嚴重。
你沒有做錯，但是，你可以不用那個方法去做，結果也會不一樣。
假如可以從頭來過...
失去的友情，已經不可能挽回。當時失去的東西，也已經不可能復得。
後悔，本來便是成長的副產品。
當你一天比一天成熟，你自然會後悔自已昨天所做的事。啊，原來你可以做得好一點。直到一天，你不再為昨天後悔，你才是真的成熟了。
我們雖然不再後悔，卻仍然會遺憾。我們一再對自已說，當時是可以有另一個方法處理的。遺憾，其實又有甚麼意義？檢討，才有意義！從今後以，相同的事情發生，你會聰明許多。
況且，事情已經過去了，根本就沒有機會讓你用今天的智慧去重新處理昨天的事。

是妳,是我 , 也是他~~

當清早起來,照照鏡子 , 一頭凌亂頭髮 , 面無血色 , 五觀尚未放回最佳位置......是誰?自己都差點兒以為見鬼 , 那麼....枕邊人看見會怎麼樣?
當脫下衣物 , 一絲不掛 , 站在鏡子面前照照 , 一個好像有幾個水泡在身上的人 , 枕邊人看見會怎麼樣?
再照照 , 明白為何他會在街上偷望其他女人 , 一個好像未完全發育的女人 , 自己也不自覺嘆氣起來........ 枕邊人看見會怎麼樣?
雖然說男人是真心愛妳的 ,便不會介意妳的外表 , 但男人愛妳之餘亦愛好身材, 這是不爭的事實!當男人不能同時在妳身上擁有, 亦不會離開妳的時候便只有偷 ,一是偷偷地望一望 , 以慰心靈 , 更甚者會付諸行動 , 偷食!
男人在心愛的女人身上得到愛 , 在身材惹火的女人身上得到實在剌激 , 如果我是男人 , 我都會希望兩者同時兼得.......
當想到這裡 , 明白到為何女人甘願會為自己的男人整容隆胸 , 日日都要為減肥而節食 ,受盡皮肉之苦......因為 "她愛他"~~~~

目標不必偉大--張小嫻

一個女孩子說，她今年考上大學，又跟心儀多年的男孩子開始了。
她渴望已久的事情，一下子全給她擁有了。
人生這麼完美，她應該覺得很高興才對，但是她忽然覺得沒有人生目標，她不知道自己需要什麼，她很討厭現在這種生活，今天她還逃學，以前的她是絕對不會這樣的。 當目標達到、當渴望己久的事忽然變成事實，我們也會頓時變得茫然，因為生活已經失去了動力。剛剛在亞運拿到金牌的李麗珊，已經拿到全世界的風帆賽事最重要的金牌。她說會考慮是不是退休，因為繼續比賽的話，是需要有動力的。人有動力，才會向前走。一旦願望實現，刹那間，也就失去了動力。這個時候，我們會迷惘起來，不知道人生到底是為了什麼。 要擺脫這刹那的迷惘，惟一的方法，就是訂立下一個目標。當你要為這個目標努力，生命又會變得有意義。 所有目標都達到了，那怎麼辦? 休息也是一個目標。尋找最好的生活品味，也是一個目標。明天要去聽一個音樂會，也是一個目標。
暫時想不到新的目標，那就放縱自己一下吧。偶然從人生裏逃課，不是壞事。 目標不必偉大，但我們要有目標。

無聊人看無聊事~~天晴

每日都依舊上班落斑 , 日出日落......
悶....悶......悶.......
上班是這條小路 , 落斑亦是這條小路.......
在公司依舊是一群舊面孔 , 舊嘴臉........
笑聲依舊的假......眼睛依舊掛在額頭上......國術<變臉>依然精通.......
不過,陳總近來愛拋書包,忽然間總會掉兩句典故出來招呼同事,
已經擢升上神檯的黃先生 , 連日來真的有點招架不來 , 被迫得將環保議題亂回應一句"六月飛霜"來 ,那裡來的(竇娥冤) ?廣東人的歇後語其中有一句 , 套在他身上最切合不過 , "紅番排隊去廁所"--語無輪次!
一個有內函的小丑, 比一個虛有其表的假道學,來得更有生活意義!

黃金海岸~~天陰有雨

剛剛放完兩day假 , 一家人走左去黃金海岸酒店玩 , 住左一晚 , 原本住兩晚架 , 點知老公force個到攪錯左 , 淨係 book一日 , 咁我地咪住一日算囉 .
今次真係仔仔叻 , 識得人多 , 佢竟然係酒店識得人 , 佢朋友仲幫我地升級到豪華6人套房 ,有大露台 , 望正黃金沙灘 , 原價一晚2300蚊 , 而家都係422蚊咋 , 正呀!
不過最可惜都係天氣唔係咁好 , 有雨落呀......
係我同個女玩緊落水滑梯時候, 竟然雷暴警告 , 要即刻關池添 , 小蕙蕙不知幾失望 , 不過我應承左佢下次會再同佢黎玩過 , 佢先開心番咋!

各盡所孝~~

係不同父母心中有不同的孝道,不同子女做不同的事情都可以係孝,或者妳會覺得物質上的滿足不等於孝,但係在父母心中眼中物質本身價值不重要 ,重要在仔女為自己買東西,仔女時時刻刻將我愛妳掛在口邊 , 妳可能會覺得行動比口講來得實際 , 但在一些家境不太好的父母來說 , 一句我愛妳可以係一種清泉甘露,彷如生活支柱!
因為貧賤富貴會影一個人的生活行為 , 但不會影響對父母的感情!只要妳肯為父母買一件衫或天氣轉變的時候打電話問候一句 ,就証明父母在妳心目中仍佔一席位~~~
其實, 做子女的 , 只要明白做父母的心事 ,最重要係心入面有父母存在, 就已經100分的孝!
妳生活幾如意充裕 ,身體幾強壯都好 , 係父母心中永遠都會擔憂!!!!!!!!!!!!!
養兒一百歲 , 長憂九十九呀女~~~~~~~
一本通書唔可以睇到老 , 一把量尺亦唔可以量盡天下父母心.

豬籠入水~~狂風大雨,每小時110公里

尋日夜晚係屋企無無聊聊,出左街行左一陣,好在早十分鐘到達目地啫,出面忽然間括大風同落雨 , d風大到吹到錦華棵大樹冧左!我返到屋企仲離譜 , 睡房部冷氣機條邊係咁流水出黎 , 成間房都係水啦 ,一地都係!!!好左佢唔係流落電制到咋 , 咁就抹左成晚嘞~~~~~又可以免費修身lu.......

不過 , 最慘都係我個後花園 , d花花比d風吹到係地下走黎走去 , 冇錯係走黎走去 , 好似有腳咁, 笑死!

深思熟慮~~天晴

男人與女人的構造原全不同 , 男人追求不用思考的快樂 , 手到拿來就最好!
女人會深思熟慮 , 不會為一時的衝動而作任何決定 , 包括分手!
正因為男人知道女人的特性 , 往往會從這方面落手 , 拖字決 , 大多能拖延一段頗長久的時間 , 甚至可以一世!
女人 , 就是給自己的深思熟慮害苦了及拖垮了一世!!

慢得可憐~~天陰有雨

成晚係屋企到舞部電腦 , 實在慢得可憐~~~~ 無無聊聊咁整左個slide show ,係偷呀毛毛架, 原本可以好快攪掂既 , 但係部電腦好似蟻欄咁,足足整左幾個鐘頭...
係我等緊電腦既時候 , 我去左打理我個後花園 , 我種左西瓜呀......係早幾日响旺角花墟買架 , 我初初諗住可能連芽都唔會發 , 估唔到真係出芽喎 , 可能呢幾日天氣真係好差同埋潮濕 , 唔好話種子會發芽 , 就黎人都會發霉!

愛情遊戲~~天晴間中有雨

~~"我愛這個人 , 但這個我愛的人卻不適合我 ,很矛盾~~"

~~結婚簽婚書的時候,手執的筆~~化身成愛的權仗 , 當離婚簽紙的時候 , 手上的筆~~就會變作一把刀!

~~愛情交往好像寬頻網絡 , 當有多人同時享用一條光纖網路的時候 , 上網速度自然慢下來,但當妳一人享用獨立10M寬頻上網既時候 , 就自然進步神速, 一CLICK就會有反應!

風雨飄搖~~帕布來港8號烈風信號

好大風呀~~~~
屋企吹到feefee聲 , d窗比風吹到開唔到 , 以前住得低咪唔覺, 而家住得高同望海就嚇死!個d白露鳥會係屋企露台下面飛過 , 真係比佢嚇死, 如果飛隻入屋企避雨 , 真係唔知會點?
快d住夠兩年 , 搬搬搬~~~~
呢個颱風一吹黎 , d"毛爆"即刻打唔通 , 個個失去聯絡 , 返到公司 , 個個已經起勢執野 , 連mc都週圍打電話比人通知打8號喎 , 不過ml就一樣保持平時作風 , 繼續做野等到呀k接佢 , 咁呀L姐唯有奉倍到底嘞~~~~另外L姐亦都比M颱風吹到頭都甩埋 , 終於都醒一醒 , 勁呀!
其實尋日成個下晝都幾平靜 , 到黃昏開始D風就黎嘞 , 香港區比佢攪到拿手唔成世 , 小欖仲有個維修工人跌左落海離開左嘞 , 希望佢屋企人可以快D平伏落黎......真係唔好睇小大自然既威力 .
希望天聞台今次唔好又比人話預測咋啦 , 天有不測之風雲丫麻!
雨過就會天青!!!!!!!

妳害怕失去多少~~三號強風訊號

一個風雨晚上 , 我去赴一個舊同學約會 , 我們闊別已經十多年了,
幾年前,她本來有一份穩定的工作 , 有一個已經談婚論嫁階段的男朋友 , 然而 , 有一天 , 她問自己:"我是不是就這樣過一生 ?"
然後, 她毅然放棄事業和感情 , 追尋自己的夢想.
只差一點點 , 她的人生便不一樣了.
我不也是過著自己從沒有夢想過的人生嗎?
我們沒法創造自己的機遇 , 機遇係上天賜予的 , 然而 , 當機遇來臨 , 妳曾否好好的把握呢 ?人生所走的每一步 , 好像都是上天已經安排好的了 , 我們能夠做到的 , 只是在機遇降臨時 , 好好的努力,更好的機遇才會出現.
捨棄從來比擁有更難 , 有人能夠捨棄現在的生活而去追求自己心裡想要的東西嗎 ?如果在發現錯誤之後還可以回頭 , 那麼 , 許多人都會一往直前 , 然而 , 人生的困難正是我們往往沒法回頭 , 所以 ,那一刻的抉擇變得非常重要 , 而每一個抉擇 , 都是貪婪與恐懼的平衡......
妳想得到些甚麼 , 妳又害怕失去多少呢?
只有自己心裡有數~~~~

人生無常~~時晴時雨

人生不如意事十常八九 , 每次發生一件事都會覺得天跌落黎 , 但係每發生一件事之後 , 回望過去 , 又會覺得不外如是 , 只差在時間上既遠近......
~冇錢既時候會想到不停咁工作 , 不理健康 , 因為當時錢最緊要...
健康出現問題既時候,會覺得健康最重要.....錢?可有可無 , 命仔最緊要....
~未有伴侶既時候,會覺得人生一定要有一個伴 ,因為無伴會陰陽失調悶死....
到分手既時候 , 哭哭啼啼, 全世界變得灰暗 , 會話早知唔拍拖...因為分手慘過死....

各種痛苦~~~天陰

我終於都作病啦......
成身骨火 , 喉嚨痛, 牙肉痛 , 頭暈 , 腳腫到爆!4個眼袋好似放左隻皮蛋落去咁 , 超樣衰~~~唯有不停咁啪牛黃解痛片同飲清熱酷,仲有煲粉葛赤小豆湯飲 , 都仲係好攰!!!!!!
係1號到今日我已經被曬到變左一隻燒豬 ,真係唔好睇少太陽伯伯既威力 , 好似入250度既焗爐咁 , 我而家知道紐約芝士餅係焗爐入面既痛苦 , 下次我食佢既時候會食得落力d , 唔好辜負佢~~~
老公既病情已經穩定落黎 , 冇再轉壞 , d滴喉就拆曬 , 不過條插左入腎既膠喉就仲未拆得住 ,要睇定d先 , 真係慘 , 一條好似盒裝檸檬茶飲管咁粗同硬既管 , 係背脊到插住 , 唉...點頂?
而家佢知道保險既好處嘞 , 可以唔駛錢住私家醫院 , 唔駛係屯門醫院訓走廊/.\

新低點......~~天陰有雨

整個人都變得沒精打采 , 精神同氣力都zero~~~~~新低點......
每日來回醫院同屋企 , 真係好攰 , 但係唔去我會好唔舒服 , 其實今次佢入院我已經冇煮飯比佢食 , 淨係煲d湯水比佢飲 ........
但係來回都要轉車 , 真係轉到頭都暈埋 , 我試過幾次唔記得落車 , 要去到總站先記得冇落車轉車喎 , 唉.....精神病又返發!!!!
而家仲要係醫院同佢沖涼洗頭 , 忽然間覺得以後既日子會點呢 , 呢d場面唔係應該係七老八十先會出現既咩 ?
我細妹尋晚打電話比我傾偈 , 佢最後竟然拋低一句 " 唉~~~都唔知妳點解咁命苦 "!
我當堂啞口無言~~~~~~

情有可原~~天晴

我同大老爺傾開 , 佢話想兩年後想賣左置樂層樓 , 再買市中心個邊d樓 , 原來佢想方便第日仔女出入 , 我就冇咩所謂嘞 , 隨遇安啦.....

今日睇報紙見到金毛太咬主人 , 睇落好恐佈 , 但係諗深一層 , 隻狗狗都係因為保護同伴先會咁做 , 係情有可原 , 做主人既應該多d了解隻狗狗平時行為 , 了解多d , 自然知道邊d可以做邊d唔可以做.

希望隻狗狗唔好被人人道毀滅啦 , 不過都係兇吉少嘞~~~~

火燒圓明園~~天晴

呢排唔知係咪搬屋太辛苦 , 所以冇嘜點煮過飯 , 湯又冇煲 , 就連涼茶都冇煲到, 攪到成家火氣好猛 , 我就成日咬到條脷 , 好痛呀!
我家大老爺就不溜都咁好火 , 加埋呢排d家私舖成日打電話比佢 , 話d家私要遲d先可以送到 , 佢即刻火燒圓明園咁 , 著曬!!!!!!果 d "東南X北"出曬 ,蓬.......一聲 , d人全部燒死曬!即刻可以話遲一日就可以送到 , d人真係欺善怕惡 , 好似丁蟹講 , 人善被人欺.....都係要成日黑口黑面先得嘞!
今年好似唔係好好咁 , 身邊既人同事都係一樣 , 希望呢一年快D過去 , 一切安定落黎 , 唔好話返轉頭咁大想頭 , 淨係安定落黎都飲得杯落......

龜波氣功~~天晴

好想放假呀.......

愈來愈覺得公司好悶 , 點解冇人辭職既呢 hair....., 可以再請個新人返黎 , 又有d新面孔睇下 , 呢個諗法有d白痴 , 同埋無聊添!緊係同一班已經熟落左既同事做野好啦 , 起碼知大家做緊咩麻,不過我真係好悶呀 , help...點算?

不過悶極都唔及見到三太個樣咁悶 , 佢個浸氣犀利過龍珠既龜波氣功 , 一返到公司 , 成個場既氣氛都 down曬落黎 , 佢一走個個都生猛番曬 , 勁!

<---大姐玲比龜波氣功攻擊完之後 , 呵呵呵, 好可憐.....

第一手真相~~~天晴

佳佳~~~天晴

好快又到左七月尾 , 大家又可以抖一陣.......

希望快d天氣轉涼啦 , 出入都舒服d , 唔駛大汗搭細汗咁 ,

尋日上綱搵到一間叫佳佳搬屋既野 , 唔知好唔好呢 , 見到d綱民既評語都幾好咁喎 , 於是就打左個電話同佢約時間報價 , 大約二千蚊 , 包拆包裝包紙箱 , 一條龍 , 希望唔駛激氣啦.....搬屋已經好辛苦 , 希望平平安安~~~~~

肥到頂住~~天晴

尋日係新屋換燈膽 , 點知係換最後一個果陣 , 燈膽爆左 , 老公整左好耐先攞得番隻燈膽腳出黎 , 我仲比玻璃吉到隻腳添呀 , 唉.....點知肚腩太大, 屈左一陣已經好辛苦 , 頂唔順 , 要老公幫我挑 番粒玻璃碎出黎 , 大肚腩真係麻煩!
再中年發福點算~~~~~咪連剪指甲都唔得囉....

不似人形TAKE 2~~天晴

今日下午終於都搬左D家私返新屋 , 係一套SOFA同床 , 等...真係會令人好攰架......好在有VV係到幫我手等咋!佢幫我係樓上等看門口 , 我就係樓下幫手搬床 , 好快攪掂左嘞!
好在今日冇咁曬 , 都唔會溶左個人~~~~
不過放左工都要再上去執野同清潔 , 如果唔係D野搬曬過黎先抹就好麻煩 , 要快手D先得嘞......

不似人形的日子~~酷熱34度

酷熱天氣警告生效 , 好熱呀~~~~~
係咁熱天氣之下搬屋 , 想死.......每次都熱到趴街!!!!
真係想唔戴個BxR BxR呀 , 不過過唔到自己果關~~~好似好唔安全咁 hair~~
38樓望出去真係唔同d , 不過真係超高囉 , 未行到出露台已經腳軟.....好在個欄杆做得好高 , 到我條頸咁高.
不過比我第日換屋 , 我都唔會換海典軒 , 個度d工作人員d工作態度真係麻麻 , 冇笑容 , 說話好似死人咁 , 就算講句bye bye都冇感情架 , 想點?要有敬業精神先得家麻 , 係咪 ? 今時今日咁既服務態度唔得架嘞!

老地方~~~~天晴

生理時鐘終於都運作正常番啦......
係到睇緊學警出更大結局果陣 , 忽然好肚痛 , 放心曬~~~~
今日下午會去睇樓 , 兩個細路知道之後 , 好似去旅行咁開心 , 個個都話要去睇下 , 攪野.....一個單位6個人去睇 , 唔知以為我地買樓添呀 , 租架咋...各位!!!!
connie留言話如果我租得成 , 第日就係我地既老地方 , 果然轉數快呀下~~

一年容易又暑假~天晴

終於都放暑假嘞.....
一切都安靜左落黎 , 黎緊要為搬唔搬屋煩惱......奶奶想我地快d搬, 但係南浪又冇咩租盤喎 , 得果一兩個 , 冇得揀!煩!
聽日我地會去 see see個單位 , a單位九百幾尺三房兩廳 , 好夠用既.....
奶奶就好心急嘞 , 我其實就冇咩所謂 , 搬唔搬都得 , 好多野整定既 , 唔係話風水好就咩都會冇事...係咪?

自責~~天晴

接二連三唔開心既事都發生係我身上 , 老公腎臟有事入醫院 , 而家連我最錫既政褀驗血後都証明有事 , 我真係好down.......
尋日係公司收到消息 , 我成個人崩潰左 , 忍左好耐唔喊 , 終於都喊左出黎......連kit同毛毛都嚇親.....真係好過意唔去.
發生呢件事之後 , 我十分之內咎 , 我做人老婆 做人媽咪 , 點解平時唔多d留佢地身體 , 攪到佢地咁 , 都係我錯~~~~
政褀好生性咁氹我 , 話而家科技發達 , 驗血超快有報告既 , 真係乖仔~~~
不過我知佢自己都好擔心~~~~

停止曬~~~天晴

豆釘哥都出左院幾日嘞 , 日子過得好慢~~~~
連我既生理時鐘都停埋 , 上個禮拜因為太忙 , 連自己仲未黎都唔察覺 , 到今日已經遲左好多日 lu......
我問過豆釘哥 , 佢話如果冇呢個病 , 佢會好開心 , 但係而家會諗諗先喎~~
我就冇咩所謂 , 隨遇而安啦......

接二連三~~天陰 , 有雨

只不過係兩日冇寫 blog咋喎......但係我就覺得好似好耐咁....
呢個禮拜我都唔係好知日子過去 , 到尋日我提早去赤柱接個仔返屋企 , 因為要趕住去睇老公 , 全日由朝早9點鐘起身開始 , 去銀行入錢供樓 , 交差餉 , 交石油氣費 , 交管理費 (呢d野平時唔係我做 , 所以有拿手唔成世咁), 接個囡放學 , 跟住12點趕過去探老公 , 1點鐘又趕出去赤柱 , 3點幾到達赤柱 , 又即刻搭返巴士出香港轉車返屋企 , 6點鬆d返到屋企 , 已經想死 , 對腳好似唔係自己咁好痛呀 , 不過唔抖得 , 6點半又趕到去醫院探老公 , 到夜晚8點半先走 , 一路行返屋企 , 一路都好靜~~~條街一個人都冇 , 我就好似死屍咁行返屋企 ~~~~~
返到屋企 , 我第一件事就係叫我個仔疴篤尿比我睇下d尿係點 , 天呀!!!!!
又係啤酒泡尿 , 我即刻問個仔之前d尿有冇唔妥 , 佢先話比我知 , 之前試過疴d好似利賓納色既尿呀 , 我即刻心情直插谷底 , 點解咁架!!!!!攞我條命好過!!!
唔好嚇我呀 , 我真係想死左佢 , 一了百了 , 但係又唔得 , 仲有好多屋企要我照顧~~~~~
要等到2號先可以同佢睇醫生 , 做檢查 , 我既日子同時間好似停左係到咁~~~

依然高企~~天晴

老公血壓依然高企 , 頭漲漲 , 護士姐姐好識講笑 ,問我老公係咪見到老婆好開心血壓上升,都唔知好唔好笑嘞~~~唉.....幾時先落番d呀?
佢血壓好d我會心情好一d , 腎既野慢慢醫啦....希望聽日會好一d啦!
我夜媽媽返屋企 , 好多野要攪 , 又要幫個女沖涼 , 又要幫佢睇功課 , 又要氹佢一陣 , 要成十點先食晚飯 , 好攰呀~~但係撻落床又訓唔著喎 , 典到天光先訓一陣 , zzz..zz.....(返工果陣喎)
真係大吉利是 , 係我探老公果陣 , 忽然間聽到有d好好聽既音樂聲 , 啋!原來隔離床呀伯去左喎 ,d音樂聲係通知黎架 , 仲要拉曬布等左成個鐘先打包 , 唉...冇人理原來係咁慘 , 等到真係搵唔到親人黎就咁攪掂算 ......

切膚之痛~~天晴,酷熱

老公終於都要入醫院啦....情況好唔樂觀!醫生話佢太年輕 , 腎功能得番最多五成......血壓高得過份 ,驚佢隨時爆血管 , 醫生要即 call白車送佢入醫院, 我去到醫院見到佢 , 成個關公上身咁 , 塊面紅卜卜 , 眼白充曬血 , 一路頭勁痛 , 我真係好擔心 , 好驚佢就咁去左 , 我從來都冇咁既諗法 , 我冇諗過呢一日既來臨係點.......我係醫院成個人都震 , 面青口唇白咁 , 我老公擔心我仲多過我擔心佢呀 , 佢仲笑我幫佢執野去醫院好似去旅行咁 , 仲識講笑氹我.......
唉..要佢一個人係醫院挨幾日 , 仲要睇下有冇併發症先可以出院喎 , 希望大步檻過啦......
而家除左要照顧老公飲食之外 , 仲要特別留意兩個細路 , 佢地要年年驗身 , 因為驚家族遺傳, 唉....忽然間覺得自已老左好多 , 好攰咁.....

十年樹仁~~天晴,酷熱

今晚又睇左拾年既十年樹仁 , 都係好好睇 , 好有意思.......
校長同埋校監既努力 , 幾十年堅持到底 , 我百份百尊敬同感動呀!
佢地兩個人真係我心目中既老師模範 , 不過佢地已經年近一百 , 日子剩下不多 , 但係就依然關心對方 , 好sweet呀......
"校長.......妳好好休息 , 樹仁的事不要太操心喔........."嘩....睇到呢到眼都濕埋 , 我老公唔知第日會唔會咁樣對我呢 ?
不過我相信十年樹仁呢個道理 , 只要我比心機去維繫呢段已經十六年既感情 ,我相信會有好多個 "下一個十年 " !!!!!!

痛到死~~天晴,34度

病痛真係人生一件苦事........絶對唔係小病是福
胃痛,唉.....真係痛到背脊都痛埋 , 終於都頂唔順去左睇醫生 , 多謝曬$140 , 仲要唔係好明醫生講咩喎 , 咩叫唔係真正既胃痛呢 ?係細菌發炎呢 ?唔明唔緊要!最緊要食左葯冇痛啦!不過就訓足成日 , d葯真係勁眼訓......

下一個十年~~天晴

睇完拾年"十年一覺" , 好有意思呀 , 真係有得著!
錢到死個日用淨一蚊都係羞恥 , 搵錢為左咩呢?嗯.....
跟住尋晚睇外判節目"飄流吧健二" , 都好好睇喎 , 真係估唔到.....
佢地一班細路仔住係東涌 , 睇見佢地諗番起中學個陣時生活 , 無憂無慮咁, 同學之間真係有友誼係到 , 哥哥同細佬之間既關係 , 好令人感動 , 一架單車 , 令到兩兄弟喊 , 細佬唔見左大佬架過萬蚊單車 ,同學仔陪佢搵足成日 , 點都搵唔到 , 細佬跟住同哥哥講對唔住 , 哥哥就喊啦 , 咁又係既....細佬黎既 , 唔喊唔通打佢咩?但係細佬真係好有誠意架 , 睇到我都好想喊添.....

好緊張~~天晴 , 酷熱

今日終於去左睇下間小學嘞....保良局志豪小學
係寶田邨架 , 唔知係咪對寶田邨唔係咁有好感 ,一行入去就週身唔舒咁,不過間學校就好大好新囉 , 一定唔會咁快搬校舍先......
其實佢係喺寶田邨外圍 ,唔係喺邨入面既, 但係我都想搵過第二間 ,不過老公就話是但啦 , 搭校車咪得囉 , 咁就唔駛行經寶田邨啦 , 係咪?
唉....我知我老公係驚我將個女送去保良局莊啟程小學個到讀 , 因為呢間小學係人間地獄 , D課程迫得好緊 ,好嚴 , 佢怕個女辛苦 , 佢有幾個伙記既仔都係太辛苦退左學去志豪個到讀架 , 我知既......
我咁多野諗 , 其實都係為左個女啫 , 我又唔想佢讀得辛苦 , 又唔想佢讀讀下又話搬校舍 , 又唔想佢學習環境咁差.........仲有好多好多野諗呀....
我真係要靜一靜 , 但係日子冇幾多咋 , 十一月己經要揀小學, 太快太快!!!點算呀 , 救命呀 , 有冇人可以幫下我?

好驚呀~~天陰, 有大雨

尋晚發左個夢 , 好驚呀 , 嚇醒左就訓唔番 , 三點幾眼望望到天光.
我係夢入面係大陸唔見左個仔 , 佢偷走左出去玩 , 點知唔識行返黎搵我地 , 跟住打手電比我 , 點知講講下又斷左線!再打已經冇人聽 ,我 喊到痴左線,無啦啦又見到 connie喎 , connie陪我係咁搵 , 又無啦啦有隻女鬼出黎話 , 佢可以幫我搵番個仔同比我帶返屋企 ,但係我要一世跟住佢 , 服侍佢 , 我一口應承 , 因為佢話會放 connie走同比我成日返屋企見下個仔 , 咁我咪應承囉...
咁就醒左啦.....connie真係好......見到鬼都唔驚喎!

醒番我問老公 , 如果隻女鬼咁問佢 , 佢會唔會即刻應承 , 佢竟然要諗一陣先答我喎 , 仲要係未必喎 , 激死!!!

六九筒~~天晴, 間中天陰

今晚我地一班人約左去食韓國燒~~~
細ling買左d手信比我地呀 , 有好出名既蜂蜜蛋糕 , 仲有必買手信鳳梨酥添!

係臨去食飯前 , 我地仲係公司度反雀 , 毛毛坐係我隔離鴿住 , 唔知係咪比佢鬧到驚左 , 竟然將一舖可以叫十三么既牌打斷左 , 我睇錯九粒當六粒呀 , 一摸完返黎 , 就諗都唔諗掉出去......真係激死毛毛!!六粒同九粒我都會睇錯 , 咁又真係抵比毛毛鬧鬼既......不過,都係問大姐ling好d , 起碼佢唔會鬧我麻 , 呵呵呵...我而家知咩叫單吊啦...yeah!

360~~天晴 , 間中陰天

嘩!!!真係驚嚇呀!昂平360跌左落黎呀 , 架纜車跌到爛曬 , 唔搭都比佢嚇死 , 我以後諗都唔會諗搭佢呀~~~~海洋公園纜車跌落黎都係話聽講啫 , 佢真係有相為証......

我呢排仲成日諗住入大澳同羗山行下 , 都係搭巴士算嘞......

今日下午臨食飯先記得自己冇帶飯喎 , 咁啱 大姐玲又要入票 , 所以就去左置樂食晏 , 食粉仔呀 , 好熱呀.......好彩身邊有毛毛係到先冇咁悶熱 ,佢係到學人睇碟計數 , 如果佢開番檔粉仔檔 , 一係蝕本 , 一係成日收多人錢而比人鬧 , 因為要記咁多款碟仔同碗 , 佢一定攪唔清!!!

心理測驗~~大雨行雷

今日玩左個MBTI TEST
結果係咁既 , 都幾準喎.........有D.....XD

不過可能當局者迷 , 外人睇我真係咁都唔定播.......搵人話比我聽係咪咁啦......

心理能力的走向

E外向型（Extraverted）：著重外在世界，因注意外在事情而獲得動力
認識外在世界的方法
S辨識型（Sensing）：使用五官收集資料，強調事實，注重實際和具體觀點
倚賴甚麼方式做決定
F感性型（Feeling）：下決定時，以個人觀點出發，重視個人價值、喜好和原則
生活方式和處事態度
P熟思型（Perceiving）：不介意突發事情，喜歡彈性生活，注重過程而非目標

各種風格的優缺點
優點
外向型（Ｅ）能運用外在環境資源、樂意與他人來往、開放的態度、行動派、易為他人所了解。
理性型（Ｓ）注意細節、重視實際、能記住鎖碎細節、耐得住煩悶的工作、有耐性、細心有系統。
感覺型（Ｆ）體諒他人感受、了解他人的需要、喜歡和諧的人際關係、易表露情感、喜去說服他人。
理解型（Ｐ）易於協調、可由各角度欣賞事物、具彈性、開放的態度、依據可靠的資料做定、不任意批評。

缺點
外向型（Ｅ）不夠立埸、需要和他人共事、喜歡變化、衝動派、討厭規範約束。
理性型（Ｓ）失去整體的概念、想不出各種可能解決的途徑、不住直覺、不求創新、無法應付太複雜的工作、不喜歡預測未來。
感覺型（Ｆ）不合乎邏輯、不夠客觀、沒有組織系統的思考、不具批判精神全盤接受、感情用事。
理解型（Ｐ）猶豫不決、散漫無計劃、不能有效的控制情況、易被分心、不易照計劃完事。

性格類型
ESFP 人際間的現實適應者
1. 戲劇性的人生，喜歡改革
2. 社交性，易適應新環境
3. 聰明，常說機靈的話
4. 為人樂觀
5. 容易利用環境資源
6. 很大方疏財
7. 易試探，因衝動性大
8. 不愛讀書，只按需要去尋求知識
9. 愛做一些「與人」的工作
10. 喜歡做冒險性的工作

性格類型的成長操練指引

ESFP 人際間的現實適應者
1. 學習相信直覺，亮光，洞見
2. 學習相信新的意念及願意冒險引入嘗試
3. 發展專心勇往直前的去完成工作目標
4. 建立平衡看正反，黑白二面的觀點去處事和作決定
5. 建立願意去獨自工作去完成有價值的意願
6. 發展心靈力量去處理看似不可能的事
7. 對重要的課題，如人生方向要表現專一，果斷
8. 決定前要對作理性合邏輯的分析
9. 負起去組織及完成計劃的責任
10. 多考慮自己行動和決定的長期後果

相識日~~大雨行雷

今日係我同老公既相識紀念日 , 都唔係d咩野特別事 , 都已經過左10幾個呢d日子 , 不過我都會記得既~~~~
今日忽然聽番ho c c 首 shampoo ~~~~

站在那滿架新貨的超市
望著數百種洗髮水
興奮地埋頭在試
為你用慣的味兒 胡亂試合著眼每樽開蓋吸一次
為著買你的洗髮水 整天也漫遊超市
紅黃綠白一支支 排好了 來面試

幸福感覺若然亦能有樽裝 擰開樽蓋被期待的即刻到訪
長長路遺下一人 仍然像你在旁 沿途又甜又香 呼吸我戀愛 盛放
就像你那天擁抱間飄過
就像你那天於我的 恤衫領上留低過
讓我全日都在分心 從衣領 回味你 靠近過
情人未在身旁 情人味也伴在我旁
悶人夏天想起你暑氣 也驟降 do do do ........


好鍾意個句樽裝既幸福感覺 , 如果真係可以就好啦 , 幾時比佢激親 , 又可以自己打開樽蓋聞一下, 開心番 , 幾好呢!!!!

包粽記~~天陰, 間中有大雨

今日一早浸定d糯米同開邊綠豆 , 夜晚食完飯我就開壇包糭子啦,好耐冇包過啦, 差d唔記左點包 , 好彩有韋太個 blog咋 , 我睇番佢點包 , 終於都包得好靚仔呀 !

因為浸左好多糯, 所以聽日要再買竹葉再包過 , 跟住愛黎派街坊先得~~

呢隻一葉糭係包比小蕙蕙既

感謝日~~天晴, 間中有雨

多得小儀比個檬我 , 同埋多得大姐ling幫手抬返兆康 , 我終於都開得番部電腦啦!好感激呀!!!!!冇左妳地 , 我會悶死係屋企!
真係估唔到大姐玲咁大力 , 唔通好似小儀話齋 , 成日係公司搬水 , 所以會咁大力?咁我都要換多d水先得啦.......
得閒就換 , 就算未飲曬都去換....哈哈哈...淨左d水就比曬呀毛飲左佢!

零雞蛋~~天晴, 勁曬

比小蕙蕙激死!點解張測驗卷零雞蛋!
一睇到我即刻想暈低 , 咩事?果d題目佢識架喎,問佢點解唔識寫 , 佢又豬曬咀仔咁 ,唉.....可能我呢排又放鬆左佢 , 比佢下晝係屋企打機 , 打到心都創曬!返到學校就咩都唔記得啦!都係我錯~~~~~
我又開始軟禁佢嘞 , 好似好誇張咁 , 但係呀姨係咁話我既.....
放學返屋企 , 食完下午飯 , 等一陣做功課 , 跟住溫書 , 跟住就訓晏覺嘞....我一定要佢晏覺 , 因為小朋友訓覺既時候會幫助腦部發育同埋會長肉架 ,所以都唔係好過份啫~~~

黃金週~~天晴, 勁曬

今日去左黃金泳灘 , 同兩個細路同埋個大細路 ,小蕙蕙不停咁問去游水未?一早起身咩都唔理就吹定水泡 , 攞定泳衣出黎!哥哥好肚餓要食野 , 佢竟然話唔肚餓 , 要快D搭車出發 , 我梗係話要食野先啦 , 點可以咁!
上左巴士 , 小蕙蕙問點解好似出旺角咁耐既?真係比佢激死!啱啱先上車咋.... 旺角係邊佢都知!
真係好曬呀,簡直想我死!我好似有病咁 , 係沙灘到我著住長袖衫 , 對腳用大巾包到冚曬,唔知以為我做咩 , 因為成個沙灘D靚女都著曬三點式 , 係不論老幼~醜靚~肥瘦~呀下.......只不過玩左個半鐘到 , 因為黃金真係有好多黃金架 , 仲有好多膠袋呀垃圾咁 , 見到都驚呀!所以都係早D走啦 , 返到屋企 , 我已經好似死左咁啦 , 七點鐘我已經做曬夜晚要訓覺既野, 擦牙沖涼 , 跟住等個仔返左學 , 我就即刻爬上床, 唔駛3分鐘 , 我已經著曬TURBO訓到成隻豬咁啦....... ZZZ...ZZZZ....ZZ

諗多左~~天晴,間中有雨

人有悲歡離合 , 月有陰晴圓缺 .......
又過左一個月 , 好快!!時間好似飛咁快走曬 , 又到年中啦 , 尋日同ling姐搭輕鐵講開5月又過左啦 , 好快又端午....中秋......年尾.....過年......好快好快....
年齡愈來愈大 , 愈唔想過得太快 , 好似好多野放唔低咁 , 唉...而家先至三十幾歲 , 咁快諗到咁長遠 , 我真係有d紀人憂天 ......

小雀仔~~天陰,有雨

老公發現到我好唔開心 , 佢成日係到講個仔 , 買蟹又話個仔同個女一定鍾意食......買雪條又叫小蕙蕙留返d比哥哥食 ......又話屋企支"新的檸檬汁"飲曬 , 要買返支比個仔返黎飲.......不過 , 我都無比任何反應佢 , 對於呢種我唔開心先做番一d野氹我既小動作 , 我已經見慣曬 , 對我毫無作用或感受 ,要我做到睇開d , 我可以做得到 , 但係要我做到"化" , 我暫時仲未做得到囉 ,或者將來michael仔出身之後 , 我會可以無咁緊張 , 放鬆一d精神 ......
而家我會把握michael仔返屋企既時間 , 同佢傾下佢將來 , 要開始引導佢去諗將來想做咩工作 , 因為我想佢快d搵到條路行 , 而michael仔亦都知放完暑假就中二啦 , 好快就6年過去 ,我發覺佢其實都有諗過時間會好快過既問題 , 只不過唔識再諗落去 , 應該要諗d咩啫 , 所以我要幫佢加d油先得!

我發覺我好似森林入面既動物咁 ,只係要教識下一代求生覓食能力一樣 , 不停咁將小雀仔擔上天空掉佢落黎 , 要佢學識飛, 跟住自己去覓食一樣!

michael 仔~~~加油呀!!!!!媽咪一定support 你架!

揀小學~~天晴,簡中陰天

而家睇緊本無毒一身輕呢本書 , 我肯去睇呢本咁多字既書 , 係因為比佢餐單吸引到 , D人食完可以一日去2次廁所喎 , 簡真係我夢想!!!
今晚係屋企上綱幫個囡揀定小學 , 遲D會親身去睇睇 ,都係保良局既真屬學校 , 希望個女唔駛咁辛苦讀書 , 只要成績中上就可以上到保良局個兩間中學 ,如果唔係實爭崩頭都似 , 一早攞定個位 , 唔駛咁煩~~~
好似肥娥話齋 , 唔駛一定要做十三么 , 食舖雞糊都好丫 , 都係有糊食 , 呵呵呵.......我唔駛個女要年年考第一 , 只要佢開開心心讀書 , 成績 OK就得嘞!當然係有個底線啦 , 唉....真係難為天下父母心!!!!
而家係我心目中只係得3種學校 , 一種係 BAND1 , 一種係 BAND5 , 另一種就係要比錢既 BAND1學校 , 校風自然都係跟住一樣啦 ,妳話唔讀好D書點得?讀又死唔讀又死!

一家人~~天陰 , 有雨

曾經係火舞黃沙入面蔡少芬講過一句說話 , "為左個仔 , 我可以任何事都做得出! "我一定好認同呢句說話 , 我亦都會咁做......
我為左個仔同老公不知嘈過幾多次 , 今次我終於忍受唔到喊左出黎 ,不停咁喊, 我真係好辛苦 ,對佢我樣樣野都可以唔出聲 ,但係對個仔 , 十萬萬個不能忍受!!做人係咪要公平d呢 , 尤其對仔女 , 一定要一視同仁 , 但係佢呢 , 唔駛明眼人都睇得出佢只係鍚個女 , 初初我都好認同佢嚴d教個仔 , 但係佢好似愈來愈過份 , 係說話上同行為上都唔理個仔感受 ,佢已經當個仔所講同做既野全部係假既 ,句句說話都不留餘地 ,我作為媽媽感受好痛!

係個仔面前成日話係我先會信佢講既野 , 我答佢冇錯 , 我會信佢, 因為佢係我個仔麻 , 佢講得比我知我就會相信佢 ,好簡單!!老公即刻口黑面黑~~~

個仔會成日走入廚房倍我煮飯 , 唔會留係廳同佢一齊 , 因為老逗唔會同佢講一句野 , 就算佢送仔返學校 , 全程個幾鐘都可以唔出一句聲 , 一前一後咁行 , 係咪唔識既呢?唔通個仔係我自己攪出黎既?

尋晚 , 我簡直崩潰一樣 , 佢無端端話我之前買電話比個仔唔啱 ,話我縱佢 , 我話我都有買對軍曹波鞋比個女啦 , 點解唔一次過話埋個女 , 我會順氣d, 係咪一定要針對個仔呢 , 無端端都要搵野黎話個仔 , 想我點 , 我即刻發火 ,我一路喊一路講 , 我知個仔唔生性同唔爭氣 , 要你冇面 , 佢要讀band5中學 , 係咪真係淨係佢錯曬呢 ?我地做父母真係一d都冇錯 ?呢6年小學 , 你有冇比過心機理佢呢 ?個仔已經要成日係學校 , 我要一個禮拜先見到佢一日 ,我真係好掛住個仔 , 仔仔一返到屋企我就要高度戒備 , 我好驚兩仔爺又嗌交, 係做錯事既時話佢好應該 , 但係係平時可唔可以開心開心咁相處呢 ?我就黎擔心死 ,個頭翳到成日痛 , 我第日死左係靈堂千其唔好一齊出現 ,我想安靜一下......老公成日話如果個仔第日激到我有病 , 實趕佢走 , 我好想話比佢聽 , 唔該你走先!!!!!但係我從來都冇出聲.......細路唔識體諒人 , 但係做大人既都唔識?竟然將所有責任推曬比個仔~~~~

冇錯, 個仔係唔生性唔爭氣 , 但係做媽媽既 , 我只會好簡單咁對個仔 , 佢就係我生既仔咁簡單 , 我只需要盡心去鍚佢照顧佢 , 唔會計較佢將來成就係點 ,我唔知咁樣做啱唔啱 , 但係我只希望兩個細路會記得媽咪係好鍚佢地 ,唔會有唔好既印象~~~~~

魔盜王3~~天晴, 勁熱

今晚去左睇魔盜王終極一戰, 真係唔知佢講咩,成三個鐘頭, 悶死人啦.....
小蕙蕙初初有包爆谷都仲可以坐定定 , 後來食完就一路睇一路打喊路 , 仲成日問得未呀 , 仲未睇完既 , 好悶呀.....其實成間戲院有一半人係咁諗!!!
因為散場果陣d人係咁話睇到一半已經好悶 , 走又唔低咁話.
不過我都志不在睇戲 , 係一心家庭樂啫~~~~

麥氏孖寶~~天晴

今朝訓到成十一點先起身 , 一起身就要同個囡囡去睇醫生啦 , 佢腮腺炎呀 , 成塊面腫到有隻雞蛋係到咁呀 ,咀都側埋一邊咁 , 真係多野既啫 , 呢樣好番個樣又黎 , 話佢唔係黑住我都唔信~~~~因為佢係我個肚三個月已經開始有唔妥 , 攪到一真到生佢出黎都要係屯門醫院產科睇住見醫生 , 不過我都好錫佢架 , 點解呢?因為佢真係好乖架 , 佢次次病都會知我擔心佢 , 佢會好似大人咁安慰番我 , 唔駛驚啦 , 我冇事架啦 , 我會食葯架啦 , 真係抵錫 !其實囡囡除左病之外 , 樣樣都唔駛我操心 , 我仲想點 ?
我每月份糧座底要擺2千蚊係到做醫療基金先得 , 佢兩個麥氏孖寶真係.....唉......

熱情果~~黃色暴雨警告

原來我已經好多日冇寫 blog啦
差d連隻莎b都餓死 ........
今日都算清閒 , 唔駛追咁多套電視劇 , 淨係夜晚睇白色巨塔 ,
可以5點半一早食完夜晚飯整蛋糕 ,整左6個熱情果mousse 杯 ,我將屋企所有淨餘物資一次過整曬佢 , 淡忌廉啦 , 忌廉芝士啦 , 熱情果醬啦 , 全部清曬!!安樂曬~~~~超滿足呀!!
星期一又要開始追溏心風暴 , 同事三分親.......仲有我既同類,師奶兵團......
一日有廿八小時幾好呢!

(DAY3)112磅~~天晴

今日上磅又輕左3磅 , 我發覺每次食呢個餐 , 我都會輕得好快, 但係個人就唔覺得瘦左囉.....
唉.....一打開個雪柜見到D芝士同忌廉 , 就好想食啦 , 好想整蛋糕呀!
LING 姐尋日放工仲話想整NEWYORK芝士餅 , 加D熱情果醬係面添 , 好想食呀!!!!!!!!!!!
要做忍者小靈精先得啦 , 好在我都係要110磅啫......

今日餐單 :
早餐--西柚汁100ml ,煙肉2條 , 拾蛋2隻
午餐--西柚汁100ml ,豬扒牛扒一塊,生果沙律
晚餐--西柚汁100ml , 灼菜 , 咩嘢肉都有d
下午茶係蕃茄一個
全日唔食飯

(DAY 2)115磅~~天晴

3磅!!!!係咪咁快呢?我諗唔係啦!可能我太耐冇食野啫, 尋晚好早食飯 , 因為我老公要返夜 , 攪到我9點已經好肚餓 , 但係我忍住唔食宵夜 , 我平時一定食架 , 屋企又冇蕃茄 , 攪到係咁飲水先訓 ................咕咕......咕...

餐單係咁既 :
早餐--西柚汁100ml , 水煮煙肉2片 ,拾蛋白2隻(蛋黃食左半隻)
午餐--西柚汁100ml , 香煎豬扒牛扒各一塊(手心咁大) ,水浸吞拿魚70g加
沙律 (卡夫低卡路里沙律醬 ,青瓜2吋 ,青萍果一個 , 紅萍果一細個,奇異果一個)
晚餐--西柚汁100ml , 炒菜一碗 , 魚一條

全日唔食飯!!!!!! 不過今日已經將餐單份量加大少少 , 要食到好飽先
得 , 如果唔係好快肚餓.

(DAY 1)118磅~~天晴

今朝上磅118磅 , 有人話我呢個年齡 , 體重停留係一個水平太耐既話 , 會好難有得減 , 吾知係咪真既呢?因為呢個磅已經大約keep左3年倒 .

今日開始食西柚減肥餐 , 我買左一盒100%西柚汁代替食西柚 , 佢話可以榨汁飲 , 咁我咪懶少少 , 買一盒試下囉 ......^=^

只要個餐單食得唔麻煩 , 我先會有心機食落去架麻 ......XD

餐單係咁既 :
早餐--西柚汁100ml , 水煮煙肉2片 ,拾蛋白2隻(蛋黃食左半隻)
午餐--西柚汁100ml , 白拾雞扒一塊(手心咁大) ,水浸吞拿魚70g加沙律
(卡夫低卡路里沙律醬 ,青瓜2吋 ,青萍果半個 , 紅萍果一細個)
晚餐--西柚汁100ml , 炒菜一碗 , 魚一條

全日唔食飯!!!!!!

小蕃薯~~天晴,有風

connie今日拎左盒熱情果醬返黎啦 , 一開盒已經好香, 好想即刻食落肚,不過真係好酸!

放左工我地又過左去置樂買餸, 係街市度我地係咁行黎行去 , 一定要呀毛自己學識買生勾勾既魚先得 , 黎緊一定要多d跟佢去買餸先得!!!!!

囡囡今日整左一份母親節禮物比我呀 , 係一個木牌同埋一張咭 , 手工係差d, 不過好好心思架 ,佢仲 自己寫左 i love you 係到添 , 好 sweet 呀......希望佢將來大個一樣咁乖巧就好 , 聽完小 yee講佢地小學果陣已經好 " 自我 " 既事 , 我忽然覺得自己果陣真係一舊蕃薯黎架 , 但係我希望囡囡會成為一個開心既小蕃薯囉.....呵呵

車仔麵~~天晴,幾曬

今日學整左個白色聖誕蛋糕,成堂都係係到砌朱古力屋仔,個d冷氣凍到d朱古力未 jit到出黎已經硬晒啦, 想死,呀yee間屋仲大鑊!以佢平時既手力, 間屋差d好似 911事件咁 , 好彩最後係ling姐既巧手幫助下, 用幾塊木板左搭右搭 , 都叫做企得住 ,整完間屋我同小yee已經好眼訓, 可能用晒d精力去起屋.跑出跑入, 都係幾好既減肥方法!!

我地去返學之前, 去左ling姐屋企拎野, 順便探 coco , 好靚仔呀 , 仲見埋佢親生 爸爸 , 好cool架 , 幾有型 , 跟住 ling 姐帶我同小yee去左食車仔麵, 好多人排隊架, 冇晒餸都好多人排隊, 我同小yee排到去已經冇呢樣冇果樣 , 佢個樣一d都唔辣 , 但係當我地食得兩啖, 我地三個已經喊咁口啦, 小yee仲留晒眼淚 ( 因為佢太睇少d辣汁仲走去加左辣椒醬 ) , 個個係咁用紙巾抹鼻哥 , 真係估佢唔到!
不過辣還辣 , 真係幾好味架!朝早既腸粉好味, 連夜晚既車仔麵都係咁好味 , ling 姐真係好介紹.
比妳十個 good 啦!!!!

salala house

ling ling house

及時雨~~天晴,但心仍是冷

今日d田灌草雪凍左啦呀, 都幾好味,係尋日同毛毛去新墟街市買架, 我地一行4人, 成支軍隊咁行入街市買餸, 毛毛就買左d魚標同菜做餸, 佢話好味喎~~~

我今晚同囡囡沖完涼吹頭髮果陣, 好開心呀,發現囡囡個頭d一撻撻有頭髮毛毛生番出黎呀, 雖然係毛毛仔, 但係我都好開心啦.....希望佢快d好番啦!!

係我極之唔開心既日子, 囡囡比番d開心同希望我 , 都算係一種釋放......及時雨就係咁解 ?

點解今年母親節會過得咁吾開心既 ?

減肥潮~~天晴,勁曬

今日知道公司好多人要進行減肥工程, 攪到我都係時候要修一修身,其實我而家都有同個女落街踐單車同慢跑,玩完真係精神好多架!
但係connie既姐姐幫我地買左pression fruit既醬,同埋我地今日行惠康發現一包榴槤味既威化餅 , 我同connie一人一包 , 都係食埋先加速減磅啦!!

其實我真係會修身架, 唔係講下就算,我要為自己做番d野 , 因為我同老公傾過一個話題,連佢都吾好意思反駁我既一個話題, 其實係我對佢觀察一排之後得黎既結果,我同佢分享左呢個結果之後, 佢十分之吾好意思咁冇出過聲~~~

驚嚇日~~天晴,勁曬

今日同個工人返深圳過一過關, 點知真係有驚無險,佢比人扣留左問話!
最慘係我地過關吾同層數架, 佢係上面,我地係下層, 出到關口吾見左佢喎,咁咪硬著頭皮問d公安可唔可以入去搵返個工人,初初都吾比架, 後尾見我地真係搵人先比我地行入去咋, 原來係比公安話佢上個月見過佢, 奇怪佢點解渣本新visa入境,所以要佢問話,同埋簽張吾知咩書, 佢出返黎果陣嚇到咀唇都白埋, 腳都震!佢好好笑咁話太太大陸真係好恐佈架, 快d走啦!因為之前我話過比佢聽大陸d人係點點點,係大陸吾見左係搵吾返架~~~佢話真係好驚返唔到出黎呀, d公安又吾比佢打電話比先生同太太, 好彩最後冇事咋!

點知夜晚我老公懶叻咁同我講話慳左4百蚊,原來係可以叫僱傭公司幫手帶佢過關架, 仲係用印尼人帶添, 咁咪可以同佢一齊係渣visa條通道過關囉,有個照應唔駛咁驚!我咪話佢下次唔好慳埋呢d錢, 有時錢係要比人架!真係激死!

長命債~~天晴,勁曬

今日放假,同個女去左買衫仔, 佢d衫好快吾o岩著, 好在佢多數執哥哥手尾, 吾係我吾買比佢, 而係佢鍾意哥哥d衫多d, 全部都係超人呀同埋比卡超~~~好似多左個細仔咁!

哥哥~~~真係令我好擔心佢~~~我好擔心我會好似大契咁, 擔心出個病黎呀......
點解會咁既呢 ? 妹妹生性懂事 , 而哥哥就任何事都闊佬懶理 , 養兒一百歲長憂九十九 , 唔知我會唔會有六十歲命 , 到時點算 ? 邊個會理佢呢 ?

而家我每次一擔心佢 , 我心口就會有野責住 , 頭就會痛到要嘔 , 我唔想做大契呀.......

今日我又喊足成晚先訓~~~~~~

衝刺日~~天晴,有雨

今日要快d做埋兩盆數,我連毛毛聊我反都話吾得閒 , 因為要星期一放假!!我一個上晝做完大埔,下午用九個字做完天瑞,太快,好驚!!希望冇o羊錯喇~~~
今日仲整左無糖蒟蒻比毛毛做星期六茶點添,真係好淡, 不過佢話夠味, 介口一牌真係清淡左!!

鍚曬妳~~天陰,下雨

週身吾舒服,死下死下o甘,梗係作病啦,d皮同肉好似想烈開,放左工去吉記買公仔比個女, 點知係冇o岩心水架, 大又話大細又話細, 終於係6點行到7點個陣買到個mario公仔, 幾得意架, 55蚊攪掂, o牙女勁鍾意, 兩隻眼見到佢好似發光o甘, 成晚攬住吾肯放, 訓到成身汗都要攬!
原來細路仔係好鍾意大人既注意架, 夜晚食飯果陣 , 小蕙蕙係我同爸爸係o甘同哥哥傾計果陣, 成日叫我, 同我講d無謂野 , 好似我 " 班主任叫馬老師,媽咪我好錫妳架 "o咁囉 , 跟住我醒水叫老公同個女傾下計, 個女要加入我地既話題o牙,真係好好笑~~~~同佢講番兩句佢又好開心o甘食晒碗飯喇!!

牛油怪~~陰天,下雨

今日下午開始落雨,係長命雨黎架~~~~細細地落下落下o甘......

公司全日都好靜,冇特別事發生過,攪到個人都悶悶地添~~~

放左工去元朗學整蛋糕 , 今日係學Opera歌劇院蛋糕 , o華!!!!個d牛油多到嚇死人,一個大約7-8吋蛋糕,就要用上2舊牧童牌牛油,好得人驚o牙,大部份同學都怕左,淨係用少少牛油忌廉,而我呢....雖然都好鍾意牛油忌廉 ,但係都用左吾係好多咋, 吾親眼見到個過程 , 真係吾知到o甘嚇人,食落口果陣好自然吾想食, 怕肥麻,食一啖可以全日吾駛食野都得啦 , 學毛毛話齋,卡路里爆晒燈!!!!!

好味好味~~~~好肥好肥~~~~

似吾似東坡肉?

小毛孩~~天晴, 勁曬

又到左月頭既日子啦 , 毛毛小儀已經計好糧 , 亞ling姐同connie就........
尋晚出左街食飯,都幾好食o牙, 每個家庭單位出左700蚊請所有mama食飯,
好貴o牙!!!!!!自己煮真係可以食好多餐喇.......
而家老公係夜晚成日反雀,因為我成晚只會對部電視,佢反幾個鐘我就睇完電視,o岩o岩好.我仲幫佢改左個名叫豆釘哥 , 其實佢不嬲係差館都係叫豆釘,不過我幫佢加多個哥字o者.而我亦都開多左個e貓,叫做.......小毛孩....
似我個囡囡麻,哈哈

無聊日~~天晴, 勁曬

今日五一勞動節,我都返左工,因為要陪幾位同事,實情係........哈哈哈
下午休息會去置樂買NDS筆比囡囡,吾知有冇得買呢?
嗯~~~~今日好似好得閒O甘 , 有O羊特別野 , 淨係夜晚去金X食母親節飯,提早左成兩個禮拜 , 因為要就KIT同肥姨個仔仔, 一個去旅行,一個返左黎香港 , 好忙O牙下!!!!
我都好想去旅行~~~~~

遺憾~~~天陰有雨

又係星期一啦 , 人仲係要懶洋洋既~~~~
尋晚睇左一擲千金呢個節目 , 個位警察叔叔話要攞奬金去補擺結婚酒 , 因為佢地九年前結婚冇擺到酒 , 希望可以藉住九週年可以補償番比太太 ,而個位太太亦都好開心o甘話呢樣野係所有女人係結婚既時候 ,都希得到既,當年冇擺酒係佢到而都覺得遺憾既事 , 我真係深深感受得到o牙~~~因為我都冇擺酒冇著到裙掛 , 佢講得冇錯 , 真係到死個日都係遺憾!!!!!!
其實到今時今日我都未能全心投入去佢地屋企就係因為呢個原因 ,仲有好記得註冊當日只係姑仔黎簽名証婚 , 奶奶同老爺都冇黎到 , 我媽咪梗係有黎啦,呢樣都係我媽咪同我講過吾開心既事!!我o甘樣結婚 , 攪到自己有遺憾 , 亦令到最親既人吾開心 ,將來我會將我未能達成的願望放係我個女身上, 我吾會比囡囡有任何遺憾 , 而我亦會幫我未來新抱攪得好好睇睇 , 吾好因為我個仔要人地個女有委屈 ,過來人麻!!嘩~~~好似好長遠o甘o咼 , 真係愈諗愈開心 , 但係千奇吾好太早o咼 ,尤其係仔仔o牙 , 人細鬼大~~~~

新不如舊

打開mero一睇, 唉~~~~一d都吾覺得有o羊好有o羊進步!

眼都花埋 , 都係鍾意以前板面多d,d舊家私又吾買得 , 仲要減晒我d度數添o牙!!

我原本已經好穩定o甘向住1000大關出發 , 點知而家減到得番5百幾咋,嗚嗚~~~~

都吾知點解要o甘做!幾時先可以再大個d o牙?

掃貨

尋日下午休息,出左去花墟行下,真係一行就死得啦 , 我老公好醒目去左新世紀行一陣,佢話知我一定行好耐,而我今次都係行左兩個鐘o者,但係就買左六盆花,都係我最鍾意既紫羅蘭,好滿足o牙!
平日行花墟真係冇o羊人架,任我行,將d花驗屍都得o牙,但係始終買吾到曇花,好想種一棵o牙~~~好想見識一下佢既香味,d網友話勁香架,樓上開花,樓下都會聞得到,同埋只會開花2-3個鐘頭,要半夜起身先睇到架!

反雀英雄傳?

尋日係屋企,夜媽媽整左個榴槤mousse cake 比pat姑姑,不過硬係覺得冇以前o甘好食既~~~可能係掛住同老公打麻雀啦 , 佢叫我開左個game比佢玩,點知部電腦吾聽話 , 反應遲鈍 , 攪到老公成日出錯牌 ,要個d又攞吾到 , 激死佢!因為佢玩6番起3秒出牌個隻o牙,部電腦慢d都吾得,嗚嗚~~~我而家得番-9000 ,點見人o牙?不過都好開心架 , 兩公婆反下雀又兩個幾鐘頭 , 時間過得真係快,成兩點先訓 , 而家好眼訓啦,點算?

黑仔莎

尋日放左工係公司反雀,好黑仔o牙,舖舖都係我輸o咼,就連一舖爭隻九萬,connie部機都要傻傻地吾郁,一d機會都吾比我,嗚嗚~~~

真係黑開有條路,連去吉之島買榴槤都係變壞左架,help!!!!
諗住整榴槤mousse蛋糕啦,榴槤變壞o咼!
諗住整蛋糕 , 打開雪柜冇蛋o咼!
諗住整糯米磁,又冇椰漿o咼!

仲有冇添呢,hair~~~~?

攪攪新意思

呢棵就係我係06年2月新年買個棵蘭花,經過左一年時

間,佢終於都開花啦,仲開得好靚添,勁多花花 , 兩昌花數過有超過30朵花 , 見到佢o甘靚o米忍吾住影低佢 , 要留念麻!!

尋晚又無無聊聊去左整棉花蛋糕 , 失敗左o牙~~

以後都係吾整la,因為我都係鍾意海棉蛋糕多d,

嗯......天色好黑o牙,好似夜晚o甘 , 好想訓覺...z....z....z....zzz.....

o甘既天氣個人就會down down 地,好悶,有冇d新奇又刺激既野玩下呢?

因為見到自己愈來愈無精神o甘 , 黎緊我會晚晚同個囡囡係屋企樓下慢跑 ,

又可以運動一下, 又可以倍下囡囡玩, 佢可以踩單車,我跟住佢跑,一舉兩得 , 係一個好提意!!

絲綢之路----終身工程

又到星期一啦,天氣好差,好大雨,今朝六點幾已經比d雨聲同風聲嘈醒左!
毛毛開始佢理想之路,雖然係幾艱難既事 , 十足十行絲綢之路咁 , 但係都希望佢成功啦 , 不過都希望佢要有計劃地進行 , 吾好一味死衝就得 , 一黎好難捱得住 , 最緊要身體支吾支持得住 , 減肥呢樣係終身工程要持之以恒 ,千奇吾好攪到骨質疏鬆咁大鑊, 25歲開始既女人要小心d , 所以要有計劃再進行先好 ,諗起佢上次個樣 , 雖然有d擔心佢 , 但係都好想佢成功架 , 吾知會點既呢?
比心機啦 , 慢慢黎 , 最緊要快!!!!!呵呵~~~~

燒烤樂園

頭先同毛,ling,connie,小儀,潔梅去左大棠燒野食,原本吾係去呢到架 , 我地因為太大安旨意諗住會有位 , 淨係諗住買o羊醬同豉油 , 所以冇打電話去西鐵燒烤樂園訂位,點知 full晒啦!!

原來元朗有好多燒烤場架 , 多到妳吾知揀邊個先好 ,最後我地都係去左大棠個個.
燒到成十一點先走 , 潔梅真係慘 , 要返出九龍 , 冇辦法,班同事都係新界人 , 要就我地lu , 下次就下佢先得! 搵日啦下!!!!呵呵......

頭先洗完頭沖完涼 , 個浴缸有好多一粒粒黑色煤炭屎o牙,勁污糟!!

有一樣我地真係要反醒一下先得啦 , 千奇吾好眼闊肚窄 , 我今晚做左一d好吾o岩既事 , 要誠心讖誨,阿彌陀佛 , 善哉善哉~~~~

心有千千結

清明雖然已經過左 , 但係以前同事亦打電話比我約去拜小玉 , 呢兩年其實我已經係幾次搵借口推左佢 , 其實我唔係唔想去拜佢 , 而係我從來都冇見過佢係醫院個樣 , 只係有一日有電話黎話佢走左啦 , 我根本仲未接受到小玉既離開 ,太突然同埋覺得佢好慘 , 點解個天要佢咁早走呢?仲要係咁樣走添~~~我真係好驚我去到見到佢個墓碑會大喊出黎......

有得必有一失

今日又要去赤柱啦,要買返套校服比個仔 , 比人偷左呀!
唔通真係有得必有一失?
我棵就死既紫羅蘭 , 已經慢慢康服過黎 , 但係另一棵已經種左成兩年個既紫羅蘭可能會比我害死!!!我將佢原本連枝分生既兩公婆分開左 , 而家入晒深切治療部 , 去左呀儀度個棵都好d , 有d起色 , 但係我個棵就........嗚嗚..

冇事既~~冇事既~~~

加油加油!!!!大家都加油呀!!!!connie,mo,小儀,大姐ling~~~~~加油呀!!
仲有 bee bee添 , 妳更加要加油 , 唔好立亂食野得架 , 好易冇命架!

東南不順

尋日放左工去左甜餅屋買mousse模 , miss仲收少左我錢添!
今日學整蛋糕啦 , 真係快,已經學左兩個月lu,學唔學到野真係見人見智.

近來發覺呀kit好似有心事 , 有電話都叫我幫佢聽 , 但係我個人就係唔鍾意死問人個種 , 所以從來都冇開口問過佢半句 , 不過當佢想講既時候我會好樂意聽,希望佢快d開心番啦!!

公司近來個東南位d女人都唔係咁暢順 , 唔係血壓高就以為自己生cancer,啋~~~~真係大吉利是,反而東南位既男人就愈來愈好火,真係一係唔出聲 , 一出聲就嚇妳一驚!

希望大家平平安安 , 齊齊整整 , 開開心心~~~~~

嘉喜酒家

由細到大都係住係屯門 , 細細個嗰陣住係新發村,而家已經拆左囉,變左做西鐵屯門站 .搭輕鐵經過都感覺到變得好快呀,全部折得既拆,搬得既搬.....
諗起屯門 , 住係屯門既人應該冇人唔識一d老牌酒樓 ,好似新墟"嘉喜酒家"咁啦, 細細個已經係個到飲茶,仲記得佢既裝修,大大盞水晶燈(應該係玻璃至真)吊係中間,週圍都係傳統既裝飾, 大龍大鳳,到佢執粒個日都係要自己搵位架,咩都係自己攪掂 , 而家已經變左珈琳幼稚園,地下報紙檔就依然風雨不改係到開檔喎......
另外仲有幾間餐廳仔 , 好似係德政圍既利源餐廳 , 同埋望住呂明材中學既彩玉啦 , 我六年小學既早餐就係係呢兩間餐廳攪掂,每天一杯滾水蛋 , 一碗麥皮或者係一隻用個銀杯仔裝住既半生熟既連殼雞蛋 , 要自己用隻匙更仔敲爛先食 , 好好玩架!
到而家我都仲有去彩玉食早餐 , c餐要芝腿治烘底 , 勁好食 , 份量唔多 , 啱晒我!

肥 " 粽 "難分

今日着左turbo , 出完毛利仲開埋貨票添 ,勁呀!!
而家外出天氣非常惡劣 , 橫風橫雨 , 一定好好訓!!!
唔知聽日訓醒覺會係點呢 , 真係有不測之風雲 ,
希望明天會更好啦~~~~

但係我呢排點都提唔起精神 , 最精神都係睇電視個幾個鐘頭,
連半夜既奪命真夫都撈埋汁先訓 , 我夜一夜先訓 , 朝早剷都唔起身,
雖然知道係唔啱 , 但係一日咁長 , 淨係呢幾個鐘我係過得最自由同舒服,
仲有就係可以咩都除晒 , 換晒鬆身衫 , 唔駛好似扎粽咁呀 , 越黎越肥啦 , 慘慘慘!!!

鬆一口氣

囡囡呢兩日食完醫生開比佢d葯 , 情況好左好多啦,
希望可以好似醫生咁講, 可以每次都拖到半年 ,
到六歲就同佢大攪 , 尋日同囡囡去覆診,醫生話食完呢次療程既葯,
仲係有痛既話 , 就要寫紙去專科睇 , 聽到都驚呀,
因為ling姐同我提過 , 佢有個朋友既仔仔就係咁要入醫院全身麻醉去剝10隻牙,mygod!!!
千其唔好係咁呀 , 我已經冇咩心力 , 再去擔心呢樣個樣嘞.......
哥哥一返屋企 , 就要擔心佢同爸爸既關係 , 爸爸好多野都覺得個仔唔妥當 , 個仔又覺得爸爸成日管住佢同鬧佢 , 我好驚佢地又嘈起上黎,
成日好多事都當聽唔到睇唔到 , 希望大事化小小事化無 !
我有日聽左 "爸爸媽媽坐下來 "呢個電台節目 , 主持人講到仔女細細個就送佢去寄宿 , 就要預左佢地唔再倚賴父母同埋唔喜歡管束既情況,因為我地係佢最需要人照顧既時侯唔係佢身邊 , 佢會覺得咁無助既時間都過到 , 而家根本唔需要我地既幫助 , 我聽完之後醒左,但係我老公就冇咩反應~~~~
又令我諗返起手心中的三角形......

好擔心的事情

終於都發生左啦!
囡囡棚牙終於都失守,牙痛啦,自從係婆婆到接佢返屋企住,已經發覺佢棚牙開始爛,我已經同佢戒飲奶訓覺同埋早晚我幫佢刷牙仔,但係真係蛀得好快架,可以睇住佢好短時間蛀平左隻大牙,好得人驚呀......我仲可以點?
我今日帶左佢去睇牙醫,係普通個隻,因為學童牙科保健唔肯同幼兒睇,迫於無奈先睇普通牙醫,但係呢個醫生真係好好醫德,唔會係又叫妳剝唔係又叫妳剝個隻(應該係話佢唔會同妳講多半句無謂野個d),佢講得好清楚,囡囡而家唔適宜剝牙or渡牙根,因為要打麻醉針,太危險,最好呢段期間勤力d同囡囡刷牙同埋用潄口水,希望每次牙痛可以keep住半年或更長時間先發一次,最快要到6歲先可以講剝牙,天呀!要囡囡等咁耐,點算?真係好悽涼,我真係寧願牙痛個個係我!
我成晚都訓唔著 , 整蛋糕都又全盆失敗曬,倒曬落垃圾桶~~~~
公司野又未入過機 , 我好似就死咁......

糖衣陷阱

人地就話好耐冇渣起支筆,我就好耐都冇用keybord打日誌啦!
呢排d時間好似非常唔夠用咁 , 復活節加埋清明節5日長假期 , 週圍頻頻撲撲,
星期四一返工個日,又要改月結,仲要改到亂晒龍,希望唔好攪到ling 姐,
最衰我改d唔改d咁 , 攪到份月結一d啱一d唔啱 , 我自己都唔知想點~~~~
要星自己兩巴先得啦!
收工仲要去學整 cake ,係我心儀左好耐既金寶蛋糕 , 我就好鍾意啦 , 唔知其他人點呢?
呢幾日買左包香蕉乾返公司食 , 諗唔到又幾好食喎 , 簡直食到停唔到口 ,
我仲同毛毛講左一d冇科學根據既道理 , 就係食呢包香蕉乾好過食薯片啦 ,一定冇咁肥,
毛毛都比我迷惑到 , 相信我講既說話 , 呵呵呵......
不過真係好味喎!!!

好擔心

好擔心呀,真係好擔心呀~~~點算?

行足成日

尋日終於都買到手套比個仔啦.....

跟住係灣仔三聯書店睇餅書 , 好多好多書呀 , 仲要冇人睇添 , 平時係商務好鬼多人架麻,不過都係齋睇冇買喎 , 真係好貴同埋我都係覺得樣樣都差不多 , 不如上綱搵實際d,慳得就慳麻!

跟住返屯門買左個睡袋 , 返深圳用架 , 成個大垃圾咁 ,一返到屋企囡囡已經拆開黎玩 , 佢以為成個人捐入去訓 , 好似田鼠捐窿咁 , 勁攪笑!

再見小甜甜

我自小已經好鍾意小甜甜 , 屋企有好多佢既漫畫同收藏 , 擺得好好架!
真實板小甜甜龔如心走左啦 , 好突然 , 好意外 , 佢係我女人偶像既其中一位,另一位係陳方安生,小甜甜既走 , 令我有一番感慨 , 有咁多錢又點 , 到死呢日只係得番一個軀殼 , 咩都帶唔走 , 佢有三百億身家 , 天文數宇 , 佢既死唔係一了百了 , 留低既係一堆堆爭產事故 , 無了期地落去......
我都係要應付我地生活既錢就夠啦, 用多d時間去陪屋企人 ,希望佢地係我去個日係掛住我 , 而唔係掛住我d遺產 ......
係時候要諗諗自己有冇用過個心去對屋企人呢 ,有冇孝順過爸爸媽媽 ?得閒打個電話比佢地呢 ?問候 一下呢 ?頭先聽到有位同事講一單新聞 , 因為佢覺得係媽媽既唔啱 , 對待仔女唔好 ,所以仔女係大家面前數落媽媽係冇做錯既 , 聽到好黯然無奈 , 點可以咁心態 , 媽媽同我地有著不可分割既關係 , 一世都不能劃清界線 ,呢d係一種緣份 , 就算媽媽做得再唔好都係媽媽 , 唔通妳唔再叫佢一聲媽媽改叫一聲咩太太 , 就可以一筆勾消嗎?好認同另一位同事所講既說話 , 佢話做仔女既有能力可以自立門戶 , 但係唔可以咁數落媽媽 , 始終都係媽媽來的 !!!
呢d觀念代溝可能係我地已經做人媽媽既關係 , 所以感受唔同......

錢錢錢錢

天陰陰 , 下著毛毛雨~~
尋日接完呀仔返屋企 , 超辛苦呀 , 點解咁多行李架?好似做咕喱咁!

黎緊9-11號我會返深圳既一間中學陪呀仔做咩文化之旅喎 , 呢次真係實死冇生~~~
呢間中學既名真係騎呢 , 叫做 " 碧波中學 "喎 , 呢d名應該係周星馳d戲先會出現既啫 ,
好攪野!!

尋日收到仔仔一張新通告 , 竟然係話要個仔6月去新加坡比賽習訓 , 係一個叫璋儀既地方,唔知係邊,因為學校經費有限 , 要我地自己負責一部份費用 , 全程要用大約5,000千蚊 , 雖然係幾貴 ,去旅行都唔駛 , 但係都算係出去見識一下 , 好過白白咁過左中學既生活 !!
原來呢間學校好多時會去澳洲習訓同比賽 , 睇黎我要重新定位我既用錢方針 , 如果唔係點應付呢d額外開支!呢個世界好現實 , 好多野係靠錢去支持 , 如果有d同學仔因為應付唔到而冇得去 , 咁真係好可惜!!!

雙重打擊

棵紫羅蘭越黎越死啦!!!!!
麥米又唔再走出個窘 ,原來係電腦一時間既錯亂先會走到出黎!!

天呀,棵花花真係捱唔住 , 連最後葉都軟晒啦,超唔開心~~~~~
唔知可唔可以用水浸番d根出黎呢?不如試下!

大發現

我今日竟然見到麥米可走出blogpet個窘,係我個blog到行黎行去喎,好得意呀

生活平靜

又到左月尾啦!
黎緊仲有5日紅日添,大家都會好忙 lu , 趕住出月結麻.....
生活好平靜 , 冇特別事發生......

好傷心

今日返到公司 , 發現棵紫羅蘭枝離破碎 ,
點解咁殘忍......真係可憐......棵紫羅蘭已經母葉同子葉種到一樣大架啦 ,
過多幾個月應該會開花 , 而家得番兩片葉 , 希望佢大步檻過啦......

我已三番四次提醒佢唔駛清潔我個位同檯面 ,我自己會做番 ,
因為已經唔係第一次整爛我d盆栽 , 次次我都冇出聲 ,今次竟然咁離譜!

我最唔開心係佢整爛左人地既野 , 可以唔出聲 , 搵d泥埋番d根就擺番係原位 , 當冇野發生過,
等我發現左打電話問佢,佢先承認 ,話賠番比我 , 點可以咁做人架......
有d野唔係話一句番比妳就得 , 每樣野係每個心目中會有唔同比重 , 花卉對
我黎講就有著唔輕既地位 , 就連我細囡囡都知道媽咪d花花唔攪得 , 所以我今次
真係好唔開心......

棵紫羅蘭係老公特登買比我 , 棵花買果陣仲係死下死下比人放埋一邊 , 種到而家咁 ,
又比人整爛 ,佢真係坎坷.....希望冇事可以再生番d葉出黎.....

4粒鐘PIZZA

尋日食完飯 , 諗住同老公去吉之超市買野整 pizza,點知返到屋企,
睇一睇個食譜 , 嘩!!要酵成4個鐘,唔駛訓咩,所以都係等放假先整啦!!!!
睇左成晚電腦 , 對眼好辛苦呀,今日又係唔想做野,我真係好鬼懶架,
但係我一整蛋糕 or整野食就好精神,呵呵呵......

同人唔同命

今日天陰,下雨......
唔知係咪天氣關係,好似冇咩精神咁,
我老公又開始放十日大假啦 , 放埋今次都仲有成三十日 ,
一年可以有成四十幾日大假 , 點解咁好架 , 分一d比我就好啦!!!
大家都係打工啫 , 點解差異咁大架!!

公司d文件已經入晒機啦,但係都好似未做過野咁既?

今日要全力出發做晒檯面d文件,一件不留!
今晚返到屋企會整蛋糕比anna , 不過仲未諗到款式,
講起蛋糕 , 我老公叫我不如學完蛋糕先報普通話課程,佢話驚我辛苦,
我諗諗下又係, 好似前日我肚痛咁咪死火 , 如果要連續兩日上堂 ,一定好辛苦!
所以我都係聽老公話 , 下期先報 lu......

食錯野

吾知係吾係前日食左一變壞左既粉仔,呢幾日都肚痛呀!

尋晚上上下堂仲走左去嘔添......好辛苦!

唔舒服整既栗子mousse cake

要10點放學返屋企食喇叭丸先得,好在今日好好多啦!

尋晚整果個蛋糕唔係咁好味,我諗我唔會再整囉......

係要的心肝做野先得啦,一檯都係野,就黎又埋數啦,想死,點算好?
會計師樓d人今日下午會走啦 ,佢地黎左都成兩個月 lu ,真係好快!

有d唔捨得佢地呀......講下咋!!!唔好當真 !!!!

二十四小時都好忙

呢幾日都好忙 , 唔係要執豆就搬木頭 , 公司D野好似未做過咁,
夜晚返到屋企又想整蛋糕 , 就黎二十四小時都唔夠用,
點算好?

今晚又要學整蛋糕啦,要成10點先放學!
不過呢兩晚我都會整一個蛋糕,因為要送比ANNA食架,
一個處女座襟章同一個忌廉蛋糕 , 希望ANNA會鍾意啦!!

改革啦

好耐無寫blog啦!因為要分心去整另一個blog,又要養多幾隻blog pet,好忙呀,終於都攪掂啦!

而家要努力d先得,黎緊我會將無名呢邊做食品既blog,記低我為左老公,兩個小貝寶同埋一班速龍同事所整既食物,至於日記會轉去blogger個到寫,其實呢兩個blog都各有各好!!

其實製作食物既人,只要睇到食既人食開心就會好滿足!!所以妳地千奇唔好怕肥,食多d啦,如果唔係我冇晒人生樂趣架啦!!